2006仲夏北海道雲雨霧之大作戰-第二日

五月二十七日...小樽Shopping - 天氣（好難得晴朗喎）

攞車　–　執左笠咁大鑊？真係風回路轉．

今朝約左９：００攞車，所以我地就喺８：００就起身落去食酒店包嘅早餐．食物方面係美式加日式，即係炒蛋，腸仔，飯，納豆，味噌湯，生果，嗰啲嘢囉．可能我地嘅食物鏈比較窄嘅關係，我同翻譯員都唔係話食得好開心．

好快咁食完早餐之後就以九秒九嘅速度跑去JR西口攞車，誰不知搵來搵去都搵唔到Toyota　Rent　a　Car嘅Counter，於是乎就去問吓JR站Visitor　Service　Counter個姐姐，嗰個Toyota嘅Counter係邊？佢應該係聽唔明我想去邊，因為我係講英文，不過佢大概知我係要去Toyota　Rent　a　Car嘅Shop．佢自己喺張地圖度搵左一輪，就係上面搵左Toyota　Rent　a　Car嘅札幌店比我地睇．一睇之下仲大鑊，發現原來係喺京王酒店對面…

就係咁，我就比翻譯員喺一路行返轉頭嗰時，就一路噴左一面屁喇，又話咩早就叫你Check清楚先架啦，又話咩一早喺網上面睇到喺酒店對面架啦…（咁你又跟我行？當然冇出聲啦，費事．）經歷左大概五分鐘極之冇癮嘅步行之後，出現喺我地面前嘅竟然係．．．〔一個地盤〕？唔係吖嗎，咁都得？翻譯員唯有喺極唔願意嘅情況之下，走左去用日文問一個喺地盤開梗工嘅工人知唔知喺邊喇．點知我地竟然喺嗰個地盤工人口中，知道左一個令到我同翻譯員都好唔開心，亦好唔想聽到嘅答案．原來間舖頭搬左去京王酒店？早知出嚟之前問吓酒店啲Staff，咁就唔洗咁慘啦…

玩吓玩吓，都玩到9：40先攞到架車，真係洩底哂…仲喺度唸唔知有冇得Refund番嗰40分鐘嘅錢添？我同個姐姐喺一路行去攞車嗰時，同佢講一陣會由翻譯員同佢學用個GPS，因為阿翻譯員識小小日文．到真係學用GPS嗰陣，我就梗係推翻譯員出嚟學啦，而我就坐喺後面聽．當我地講極佢都唔明嘅時候，翻譯員終於都決定用佢好有限嘅日文，問返嗰個問題，佢突然之間好似訓醒左咁叫左一聲”Nehongor？”即係日本語咁解．喂！我喺行梗過嚟嗰陣咪同你講左囉，大姐…翻譯員為免佢係咁講日文而自己聽唔明，佢就答佢"Scorshi"，即係話少少咁解．

喺佢知道翻譯員原來係識小小日文之後，成個節奏就馬上快左好多，佢以一半日文加上一半英文咁講解個GPS嘅用途．喺最短嘅時間裏面學左點樣用電話或者五十音去Set個目啲地，同埋學左點樣揀用收費道路知後．我地就自己玩左個GPS一輪，點知隔離個哥哥見到我地好似有啲唔係好識用咁，佢馬上過嚟睇吓有咩幫到手喎，呢啲服務態度先係波架嗎．

出發去小樽Shopping喇

我地用英文話比佢聽冇問題，然後再玩左一陣，之後就馬上Set左個目啲地去小樽浪漫館，然後就全速前進．只係用左半個鐘嘅時間，我地就到左小樽，再行多一個字左右就到左我地第一個目的地：小樽浪漫堂．到達目啲地時間係10：40分．嗰度真係好靚，但係啲音樂盒就真係貴左啲．原先答應左翻譯員任佢揀一個自選歌曲音樂盒，不過翻譯員唔知係唔係都覺得貴，所以到最後佢都係放棄左．喺小樽浪漫堂行左差唔多一個鐘

影左好多相，又買左小小Souvenir之後，就過對面細啲嗰間夢之音．感覺係好……細囉．唔洗十分鐘就行完夢之音．我地對夢之音嘅感覺除左細之外，仲有一個感覺，就係怪．唔知點解，佢除左賣少少音樂盒之外，其他大部份嘅竟然係公仔，而且款式仲多過音樂盒添，有Snoopy啦，Miffy啦，Micky啦，宮崎駿系列咁啦，仲有好多其他唔同嘅卡通片主角添．

行完呢兩間舖頭之後就有另外兩個發現．第一個發現，就係原來呢兩間舖頭出面係有幾個好大嘅花生米（Snoopy）公仔．翻譯員梗係唔會放過呢個咁好嘅機會同佢地影番幾張相啦．過左十分鐘左右我地就聽到第二個發現，你冇睇錯，真係聽到而唔係睇到，因為係啲聲音首先吸引左我地，然後先睇到架．原來喺馬路附近有幾個大煙囪同埋音樂盒，每隔一段時間（我估係每逢踏半同踏正），嗰啲煙囪同音樂盒都會用好好聽嘅音樂嚟報時比路經嘅途人聽同睇．冇錯係真係有得睇架，不過因為真係有啲突然所以我地都把握唔到時間將呢個咁嘅情景影低同你到分享一吓．

聽完又睇完咁動聽同咁得意嘅報時之後，我地就馬上楂架車去食正壽司喇．唔洗十分鐘就到左正壽司，行到過去正壽司個門口嗰陣，真係有啲驚，因為個門口真係好Grand，好似一啲好貴好貴嘅地方咁．雖然真係有啲貴，不過我地都係覺得係值得嘅．我地叫左兩個Set，一個係3800Yen嘅特上政壽司，另一個係2800Yen叫Tachibana嘅Set，中文真係唔知叫咩，不過勝在有相睇，同特上政壽司差唔多，主要係少左個o-toro同botanebi，即係大吞拿魚腩同牡丹蝦．我地學人地坐吧檯，可以睇住啲大師傅喺你面前準備你Order嘅食物，真係好有Feel架．一般嚟講，佢地都會主動咁同你傾吓偈，不過可能佢知道我地唔係日本人，所以就冇同我地傾．當佢地將啲準備好嘅食物攞比翻譯員嗰陣，因為張吧檯唔係好大，又已經放滿左餐具，翻譯員有啲唔知點算好．正當我想提佢嗰陣，大師傅已經好有禮貌咁教佢，其實係要將啲壽司放喺吧檯前面嗰一級度．啲壽司真係好好食，最差嘅就係嗰啲由黃色一粒粒組成嘅唔知係咩魚嘅魚春，因為有啲腥腥地，翻譯員仲差啲嘔添，之後就冇哂喟口喇．不過一向好怕喺香港食嘅魚子壽司，就一啲問題都冇，完全冇腥味不特止，仲好好食添，真係估佢唔到．

小樽水族館

醫完個肚之後，決定楂架車去小樽水族館，睇吓魚咁囉．因為呢啲地方一般都比較早收皮．用左大概二十分鐘嘅時間就去到小樽水族館喇，到達時間大概係１：２０左右．呢個水族館真係好易認，因為離好遠你都已經可以見到水族館出面嗰個遊樂場，最易認都係嗰個唔算好細嘅摩天輪．其實個遊樂場除左啲只係啱小朋友玩嘅小兒科遊戲之外，都有一個幾啱大人玩嘅人力遊戲架．你冇睇錯，佢絶對係一個人力遊戲…佢就係一個半空單軌人力單車，佢雖然離地面唔係好高，不過嗰度都好鬼死大風吓，見到架車郁吓郁吓咁，唔知係唔係比啲風吹到咁架呢，你都咪話唔驚．

水族館嘅入場費要1300Yen一個人，都成百蚊港紙，一啲都唔平．個水族館最吸引我嘅分別係門口嗰三隻海龜，同埋入面嗰一老一幼嘅蜥蝪，不過佢地好似食到好飽咁，郁都唔郁吓，可能係因為困住佢地個缸，真係太細喇．而另一方面，最運吉嘅就係食人魚囉，係人都知食人魚係好大食，所以缸水係濁到咩都睇唔到囉，你話係唔係運吉吖？連有無魚都唔知，唯一可以証實有無魚嘅方法就係放自己隻手落去…你話係唔好運吉呢？

其實自從去完沖繩，大阪同埋池袋嗰幾個水族館之後，我地對其他日本嘅水族館都冇咩期望，一來係佢地喺魚嘅種類分別都不太大．二來我地都覺得香港嗰個海洋公園比起上來一啲都唔差．雖然魚嘅種類唔係咁多，不過起碼除左睇魚之外，都仲有一啲幾激嘅機動遊戲玩吖，點睇都好玩過呢個咁幼稚嘅遊樂場吖．仲有個望著海嘅海洋劇場添，Size亦都大過呢個海洋劇場，而且仲有得坐添．都係唔好賣花贊花香喇，去過你自己感覺吓，就知我有冇講大話架喇．不過翻譯員似乎唔係好認同喎，佢到而家都仲係好掛住沖繩個水族館．又真係幾大又幾多魚嘅，不過都係我衰，冇Charge夠電，所以影唔到相，如果唔係都可以分享吓比你地睇，睇吓啲鯨鯊其實係有幾震撼．

小樽繼續Shopping

喺個咁細嘅水族館玩左半個鐘已經玩到冇咩嘢玩嘞，跟住就楂架車用左三個字左右，去最多舖頭嗰條街，Shopping去也．大部份嘅舖頭都係比較細，而佢地賣嘅玻璃小飾物，大至上都係一樣，連價錢都係一樣．行吓行吓，比我地見到有100Yen一小片嘅夕張蜜瓜賣，我同翻譯員都流哂口水，所以就決定買一片嚟止吓渴先，甜就真係好甜，不過有啲甜得滯，唔知賣300Yen嗰啲會唔會好食啲呢？不過我都唔係話佢唔好食，我返到香港食好多蜜瓜都係一啲都唔甜，所以你話要食甜嘅蜜瓜係幾難呢．而且亦可能係我地真係好期待有得食頂頂大名嘅夕張蜜瓜太耐，所以嗰片蜜瓜喺我地比完錢嗰一刻同一時間馬上消失左．．．．．所以冇相睇．

食完個咁甜嘅蜜瓜就入左去北一肖子館，呢間就比較大一啲，不過同浪漫堂比都仲係細左小小，不過佢嘅通道就比較闊，好行啲，同埋佢賣嘅嘢係著重玻璃擺設，例如玻璃碗筷，香薰燈，燈罩咁．行到有啲攰攰地，就去左雪印食雪糕，順便坐吓咁．蜜瓜味嘅雪糕都幾好食，不過個抺茶雪糕就麻麻地喇．個雪糕嘅質地都唔錯，好滑，可能係因為我不嬲都唔係好鍾意食抺茶味呱，不過你係唔會估到連雪印都有好多玻璃小飾物賣，而我地竟然都買左唔少添．

小樽運河

之後就梗係去小樽必到景點　–　小樽運河啦．翻譯員就叫我楂車去，不過我就想行去，因為我覺得小樽其實唔係好大，用行嘅可以順便睇吓其他舖頭同風景吖嗎．可能翻譯員隻腳真係特別構造．如果係行街買衫褲鞋襪化妝品咁，佢可以不停咁行三四個鐘都面不改容．而家行三四個字去小樽運河就又話口渴，又話好攰．到最後行左大概兩個字多啲嗰時仲話腳痛添，仲發哂老脾咁話點都唔會再行喎，又話我老點佢咁話喎，又話我話轉個灣就到都唔係咁話喎．吓？係真唔係啊？明明仲有一半都唔夠就到，都要返轉頭？係，我可能講得好似近左一啲，有少少老點．但係我真係睇過啲旅遊書話小樽真係好細，可以用行嘅去欣賞咁話架嗎．同埋我覺得去旅行係應該多行多睇，咁先可以欣賞多啲唔同嘅景色架嗎．但係知道同佢講咩道理都係假，因為佢而家根本就聽啲咩道理都聽唔入耳，真係冇哂佢辦法！唯有好似就小朋友咁就吓佢，行返轉頭攞車囉，唉．

架車經過我地頭先返轉頭嗰度再過多二三個路口就到小樽運河，翻譯員仲話喎”嗱，都話仲有好遠架啦”．我其實唔想旅行搞到大家都唔開心，所以就冇駁返佢轉頭，如果唔係就真係浪費左我頭先就佢嘅心血．喺運河附近兜左兩個圈，見到有兩個Parking，不過好似係人地公司嗰啲Parking咁，所以唔敢亂嚟，最後決定就咁學人地拍喺街邊就算．都唔知係咩邏輯，唔通拍街安全過拍停車場？其實有超過五十個巴仙嘅原因，係因為拍車嘅地方有一檔燒蟹腳！

一落車第一件事並唔係立即買燒蟹腳食，而係入去舖頭裏面方個靚便先．方完便之後亦唔係立即買燒蟹腳食，而係少行一吓呢一間賣Souvenir嘅舖頭．呢間舖頭其實冇咩特別，唯一特別嘅就係佢裏面有一間壽司食堂，不過我地都唔係咁肚餓，所以就無幫襯到．出到嚟，時間都只係四點半左右，想話埋去幫襯嗰間燒蟹腳啦，點知佢做左一個交叉嘅手勢出嚟．吓？大佬!唔係啊？四點半咋喎？翻譯員仲好唔甘心咁用佢好少用嘅日文Confirm個哥哥仔一次添，結果當然都係一樣啦…唉，唯有嘆自己一句　-　冇食神啦．

繼續行去運河方向，路經一間教堂．啱啱好有一對新人結婚，真係有啲好幸福嘅感覺，而我地就梗係唔會錯過呢啲咁好嘅機會同佢地影番張相啦．唔知係唔係涷嘅關係呢，呢個新娘子同尋晚喺京王酒店架電梯嗰度碰到嗰個都有一個共通點，就係佢地都係比較[大隻]．唔係我口衰啊，係真架，不過基於私隠嘅問題，我就不便張人地嗰啲相Post出嚟啦，不過我真係冇講大話架．

喺行過去運河拍攝景點其間，留意到經過嘅原來都係一啲被人棄置左嘅貨倉．喺行到運河個轉彎位嗰陣，竟然比我見到，原來運河係有提供冇料Parking，冇料即係唔洗錢咁解，唉，老洩添！終於都行到條運河拍攝景點，好彩我地不嬲都對佢冇咩期望姐，可能係因為聽得太多人講條運河嘅壞話喇．不過真係估唔到條運河景點原來真係咁…窄嘅，但係都真係幾靚．好快咁影左幾張相之後就上番我地架戰車返去札幌第二個大作戰嘅地點：Kani將軍去也．

決戰Kani將軍

Kani將軍係我地呢個Trip裏面其中一個風雨不改嘅行程．喺未出發之前，已經喺網上面Print左啲Coupon出嚟．因為比較多車嘅關係，我地用左一個鐘先可以由小樽運河返去札幌Kani將軍．去到Kani將軍兜左兩個圈都兜唔到入佢地個Free　Parking，唯有拍喺佢後面300Yen一個鐘嘅停車場．坐低之後覺得好肚餓，仲唸住一生點都要豪一次，萬五Yen就萬五Yen啦，所以咪叫左兩個Set囉．點知佢個Set係有九個菜架，仲要有啲係好飽肚吓架添．

當嚟左七個菜之後，翻譯員已經冇哂戰鬥力．而身為冒險家嘅我，唯有獨力迎接第八個考驗（道菜），正當我以為已經成功征服左Kani將軍而開始沾沾自喜之際，個Waitress姐姐竟然將殺傷力驚人嘅蟹腳壽司端出嚟，仲要係每人有五件咁多添．不過佢都好醒，我地都未開聲佢已經問我地要唔要外賣，我地就梗係馬上話要啦．佢可能係見到我地兩個都坐到好衰，個人仲已經好似冇哂氣嘅公仔咁添．不過身為冒險家嘅我，點可以咁丟臉不戰而降呢．於是乎我就拼死繼續作戰…　

對話

翻譯員：“你好叻咩，咪食得兩件咁大把！講到天花龍鳳咁．”

冒險家：“咩啊？起碼我返到酒店都仲可以將所有蟹腳都食哂吖！”

臨走嘅時候仲比我地聽到今次Trip裏面好少聽到嘅廣東話添，原來係一家有錢人，點解我一睇就知人地有錢？喟，一家四口去北海道喎？要洗幾錢啊？唔係有錢人係咩啊？跟住我地連原先話要去嘅T38啊，札幌電視塔啊，同埋嗰個藻岩山瞭望台啊，都冇去到．因為我地基本上連企直個身都有啲困難，而且個天仲開始落雨添．就係咁我地嗰晚就帶著個大肚腩先去小Shopping一吓．Shopping喎？梗係幾飽都冇問題架啦…去邊度Shop？梗係丸丼今丼啦，我去唔去？仲洗問？我梗係喺架車上面小睡片刻啦，順便回吓氣吖嗎．然後先至返酒店訓覺．到第二日先知，原來呢個Kani將軍作戰嘅失敗，牽連之廣，竟然係超出我地嘅想像…

返到酒店停車場門口，雖然我地喺嚟之前已經Check左京王酒店係會提供住客冇料Parking．不過穏陣起見，我都係叫左翻譯員去Reception度Check清楚，而我就停架車喺停車場門口等消息．點知得出嚟嘅答案係1000Yen任拍．雖然係同網上面寫嘅有出入，不過基於語言唔係好通嘅原因，而且價錢都算OK，所以我同翻譯員都唯有接受呢個Offer．再講，翻譯員亦都冇用任何方法去Double　Confirm過，我就覺得好可能係佢睇錯姐．

嗰晚喺酒店停車場，仲比我親眼見識到咩先叫做大男人．唔該喺香港睇梗呢編遊記嘅女士門清醒啲，睇清睇楚你地係有幾幸福先好再呻你男朋友點點點喇．件事其實係咁發生嘅，我地入到停車場架電梯，見到一對日本Couple，個男嘅兩手Fing　Fing咁行入嚟，而後面個日本婆，就好辛苦咁自己搬梗一箱好大嘅行李（一般嘅大行李夾）上大概十級樓梯咁囉，因為由停車場去電梯係一定要行一條樓梯嘅．我無拎過嗰箱行李，所以就唔知有幾重，不過睇個日本婆個辛苦樣，我估都唔會輕得去邊．你話做日本男人幾幸福？

我的Picasa相薄

行程

札幌京王酒店10：10　->　小樽浪漫館　10：40/11：50　->　正壽司12：22/12：59　->　小樽水族館　13：22/14：04　->　小樽雪印14：33/16：20　->　小樽運河　16：28/16：50　->　札幌Kani將軍18：00/19：20　->　丸丼今丼　19：40/22：40　->　札幌京王酒店　23：00