2006仲夏北海道雲雨霧之大作戰-後記

1. 駕駛編




1. 日本係用右軚嘅，香港嘅朋友應該冇問題．


2. 紅綠燈係Standard嘅，邊度嘅朋友都唔會有問題．不過唔知點解有啲日本人啲反應係比我快少少，我反應唔夠快係因為佢地紅完之後係黃同綠燈一齊着架，我估佢地可能係睇隔離線嘅燈去估行得未．


3. 一般嚟講，你轉彎（左同右都會有機會，不過轉左邊嘅機會係多啲）嘅時候，要小心行人會過馬路，因為你同佢都係綠燈．所以要慢慢嚟，最好瞄一瞄行人嘅燈先．


4. 去日本之前，最好搵定哂你要去嘅地方嘅電話號碼，因為喺GPS輸入目的地，用電話號碼就可以，不過唔輸入電話號碼係會好難用嘅．小心有啲地方係用咩咩觀光恊會嘅電話，唔少都係流嘅，佢真係話比你聽點去嗰個觀光恊會，而唔係你要去嘅地方．所以輸入左之後就最好Check清楚個目啲地啱唔啱先，千期唔好大安指意以為GPS或者個電話號碼一定冇問題．如果係去百貨公司，最好搵佢個Parking嘅電話，因為好多百貨公司都有冇料Parking嘅，咁咪唔洗亂咁拍囉．記住啊，六月一日起已經推行新嘅交通條例，亂拍車會即時被起訴，仲貴過你比Parking嘅錢，尤其係喺札幌同埋函館啊，我喺電視見到好多人中招之後嘅慘樣．


5. 如果真係搵唔到電話，五十音其實都唔係太難，小心啲個字嘅四個角，可能係同個字要分開嚟入架．再唔係，喺個GPS嘅Menu係可以慢慢揀，首先揀城市，然後揀懸，再然後慢慢Break　Down落去．不過我地就真係未試過咁揀而又成功，可能係我地冇耐性，又或者翻譯員真係好有信心佢嘅五十音都流唔哂咁囉．如果真係想買保險，可以買一本叫做Drive（當然連個名都係日文架啦）嘅書，好多地方都有得賣．本書有好多楂車要知嘅資料，例如由札幌去富良富要行邊幾條路，又要幾耐同埋幾多錢咁．我都係打書釘打返嚟架，不過去之前其實已經知道有呢本書架喇，同埋都知呢本書應該有少少用嘅，不過就係唔放心，所以買左一本地圖書，而冇買到呢本書．到最後就好後侮，因為本地圖書用處真係不太大，極其量都係可以比我地睇吓同下一個站嘅距離有幾遠，可唔可以信GPS嘅時間咁．好彩好多Seven都有呢本書，如果唔係有好多地方我地都可能去唔到，例如網走嗰間食蛋包飯嘅地方…本書個日文名應該係（ドライブ），封面係綠色嘅，裏面係好多電話號碼同埋少少圖咁啦．


6. GPS其實都好準確吓，就算係荒山野領，都冇咩大問題，只係試過三次老點姐．第一次係叫我向後行，不過明明係一條單行道，所以我都冇聽佢點．第二次係話我前面冇路，不過我明明行梗，點會冇路呢．第三次係點我行一條掘頭路，但係我就覺得情有可原，因為條路係比山泥掩沒左．最大嘅問題反而係市區．原因係紅綠燈太多，個GPS最唔準就係當你加速又或者減速太急，喺咁嘅情況底下，佢係會估計錯誤，所以你就會有機會Miss左個路口．所以轉彎嗰時就慢少少，咁就多數冇問題架喇．


7. 如果可以嘅話，就記住裝返個DrEye．因為有啲Website就算係用www．excite．co．jp都Translate唔到架．唔係因為Translate得差，而真係Translate唔到．例如豐田個Site，www．excite．co．jp就只可以Translate到個FrontPage，一入到去Book車嗰頁就Translate唔到，因為佢係用HTTPS．但係我用DrEye就成功Translate哂，我就連所有ComboBox嘅Value係講梗咩我都知，呢樣嘢係連你Copy　And　Paste個Page去www．excite．co．jp都做唔到架．


8. 大家最關心嘅都應該係快相嘅問題．我喺北海道只係見過三個快相，不過喺嗰三個快相前面一百米左右，已經有路牌話比我聽前面有快相，叫我地小心啲咁話喎．放心，係用漢字寫嘅，如果唔係我都中左架喇，好彩姐．不過喺函館返札幌喺道央自動車道嘅時候我經過一個好似係快相嘅東西，雖然佢就冇閃到，但係我GPS個Console就係咁響，直至我架車去返安全車速為止，真係唔先點解．


9. 路牌方面．喺道央自動車道經常見到三種路牌．第一種已經成日喺呢編遊記裏面提住，就係動物出沒注意，流嘅居多，冇咩特別．第二種就係雪軚交替場所，對我嚟講係冇意義嘅．而第三種係我之前講過要話比睇梗嘅你知嘅，就係”自動速度取締道路”喇，如果你要問租車公司關於Cruise　Control嘅嘢應該係好啱用嘅，我都話冇可能冇架啦，不過就遲左少少先知咁囉，希望幫到你啦．

1. 洗費編

今次可謂超級超出預算嘅表表姐…所以返香港之後就過住啲破產嘅生活…好慘．

團費: $11,000.00

住: ¥91,350.00

租車: ¥61,425.00

高速公路: ¥12,850.00

停車場: ¥2,890.00

油: ¥14,470.00

食: ¥55,447.00

零食: ¥15,874.00

入場費: ¥8,320.00

Shuttle: ¥18,720.00

當然仲有好多其他洗費，例如買書啊，化妝品啊，衫啊，同埋R左嗰啲咁，都係不便公開，而亦唔係少，你話慘唔慘喇．

2. 網頁編

其實今次花咁多時間做呢一個網頁出嚟，有少少都係因為我個人想練習下點樣做一個比較Fancy嘅網頁，而唔洗用到Flash咁重磅嘅Tools．而今次呢個網頁係用左好多Dojo Toolkit嘅Widget.

有用Layout Container，Content Pane同Fish Eye做嘅Menu啦．

有Dynaic Update嘅Link Pane做Body同用Title Pane做嘅Collapsible Paragraph啦．

最後就有用Slide Show做嘅Photo Album啦．不過我都知可能咁樣Present啲相會比較難睇啲，所以其實每頁我都放左條Link去Yahoo Photo個相簿度，等你地可以睇得開心啲．而所有Body嘅相都可以Collapse，等你地可以方便啲Print出嚟．希望可以幫到Plan梗出北海道嘅你喇．

3. 免費網站編

我地已經破左產，所以都冇錢Host我地呢份遊記，喺咁嘅情況底下，我就Source左一啲免費Hosting嘅Website，不過都唔係一凡風順，你都知我地通常做咩都會遇到唔少問題架啦．

www.geocities.com

呢個出名嘅免費網站真係好好，又好快，所以好多人用吓．不過我就遇到二個難題．

第一，我揀來揀去都係有好多相槪同你地分享，啲相點Trim都有二十幾MB．而Geocities就最多比二十MB我，所以好難搞．

第二，Geocitiies係冇FTP Account比我呢啲免費嘅用戶Manage啲Content嘅，唯一可以用佢嗰個Web嘅Interface去一張一張咁Upload，不過我淨係個DojoToolkit都有幾百個File，點搞啊？

www.gig4free.com

呢個出名嘅免費網站都唔錯，都好快，又有FTP Account，不過我就遇到一個難題．

個Website唔係好夾我嗰啲Dojo嘅Javascript．

www.awardspace.com

最後比我搵到呢個免費Hosting嘅Website，佢有齊哂我要嘅Feature，啲Javascript又冇問題，不過就係慢左少少，不過無辦法喇，鬼叫淨係得呢一個免費Hosting OK無問題咩．

4. 後記中嘅後記

本來個遊記無咩大問題，但係自從我upgrade左去vista之後，就唔知點解有時會load唔到，但係firefox就咩事都無。雖然我唔鍾意M$，不過主流始終都係IE，無得講。似乎dojo同IE嘅compatability真係有少少問題，而且有d friend佢用IE6都話唔work。。。

無幾耐之前Yahoo Photo又無啦啦要收錢，搞到我要轉過去picasa，但係花左咁耐打左咁多相嘅caption咪又要打過？？？唉。。。

awardspace本來都無咩大問題，但係asia load佢就有d慢。。。。

為左解決以上嘅問題，我就唯有花左少少嘅時間將所有content dup一份過嚟blogger，如果過程中有咩錯失，就煩請留個comment比我，見字必覆。

2006仲夏北海道雲雨霧之大作戰-第＋日

六月四日...返香港　－　天氣（都走咯，咩天氣又有咩分別吖）

又要返香港喇

今日唔洗講都知只可以小Shopping一吓，然後就要去機場，我地揀Metropolitan嘅原因，主要係因為佢有Shuttle去機場，不過Shuttle要成三千Yen一個人，真係肉都赤哂，兩個人要成六千Yen喎，真係夠錢租番架車楂一日．不過當我地尋日買Shuttle飛嗰陣，個姐姐係都要賣一點半嗰班車，佢話怕會塞車喎．其實我地係搭六點八嗰班機嘅，所以想晏少少先去到機場，不過其實都唔係有好大分別，多出嚟嘅時間都唔夠去新宿，唔好講話來回啦，所以就由得佢點話點好喇．一早起身就去左Metropolitan　Plaza　嗰間Excelsior　Café食早餐，不過真係好鬼貴，食左成八十蚊港紙，只係食左一人一件三文治同一杯奶，仲要冇分吸煙同非吸煙區添．都唔明，早餐姐，佢地洗唔洗扯到咁盡啊？搞到我地食完之後仲成身煙味添．唉！之後咪又係翻譯員行Tobu嘅時間囉，真係無聊到死．我梗係講我自己啦．下次我真係情原比多千幾蚊買直航機，唔洗等我無聊左日幾，仲有就係唔洗徙哂啲咁寶貴嘅假期吖嗎，當然都係講梗我自己啦．最緊要就係都唔洗特別安排Shopping嘅行程比翻譯員囉，因為原來邊度都有得Shopping架．我真係好懷念沖繩，因為嗰度真係咩都冇得Shop架．．．

今日嘅重點就係食下午飯嘅地方．佢其實係一間食拉麵嘅舖頭，不過佢嘅拉麵水平只係一般，個拉麵上枱嘅時候，啲餸（例如义燒拉麵嘅义燒同埋啲蛋啊）都仲係凍嘅添，真係比較失敗．我咁都仲要再去（冇錯，我上次去池袋已經幫襯過呢間咁嘅舖頭架喇），又仲要介紹呢一間咁失敗嘅舖頭，梗係有原因架啦．原因其實係好簡單，就係佢竟然有一味好好食嘅菜，真係值得一試再試嘅，呢一味咁令我回味嘅菜名係叫做”炸雞”．原本只係平平冇奇嘅一個炸雞，竟然比一間咁嘅舖頭，做到色香味俱全．一般嘅炸雞多數都係炸到乾哂水，而佢地嘅炸雞係仲有肉汁嘅，所以佢地唔洗靠哂啲味精，唔係話佢地無落味精，不過啲味精嘅味絕對唔會蓋過哂啲雞味，好似KFC咁姐．我本人就比較鍾意食呢個炸雞多過咩KFC多多聲喇，不過翻譯員就唔係好同意囉．

去到機場Terminal　One，原本唸住會好細，咁早去到都唔知點打發事．因為之前都去過一次，感覺係冇咩嘢行．點知一落到車，仲以為個司機去錯地方添，因為同我地之前去過嘅Terminal　One完全唔同哂，突然之間，翻譯員好似醒左咁，話咩”好似喺網上面都聽過人地話Terminal　One會從新裝修過，真係估唔到時間會咁啱架添”．唔洗問阿貴，又係勁Shopping嘅時間啦，我有咩做？咪又係坐埋一邊等囉！Shop到攰攰地，就食番個麥記囉，不過其實我地一早都計劃好要嚟食麥記嗰個蝦漢堡架喇，因為真係好好食架，哈哈哈．就係咁，今次個北海道九天團就完滿結束喇．多謝哂收睇，希望唔會悶親你地啦．拜拜．

我的Picasa相薄

 

行程

Metropolitan　Hotel　->　Tobu　->　天下一品　->　Metropolitan　Hotel　->　成田空港　->　赤立角機場

2006仲夏北海道雲雨霧之大作戰-第九日

六月三日...告別最愛嘅北海道　－　天氣（天睛　－　你話死唔死）

太陽出來了

今日完全冇行程，訓到晏一晏先起身，食完早餐又浸完溫泉先慢慢去ChckOut．之後咪去打吓書釘，又食吓雪糕咁囉，真係無聊到震．再之後就又去尋日嗰間餐廳食午飯，我地都知道係早左少少，不過真係唔知做咩好．今次我地就叫左個咖哩飯，不過佢個蛋包飯好食過呢個咖哩飯好多．而今日老板娘仲慘過尋日，佢原來感冒喎，仲要一個人睇住哂成間舖添，老板又唔知去左邊，唔怪得我地點菜係佢嚟寫單啦．如果唔係我地都唔知佢感冒，因為佢鼻塞塞咁，仲企得離我地好遠添，所以咪知道囉，日本男人真係…過份．不過有啲好奇，日本人唔係好衛生架咩？點解佢病都唔帶口罩嘅？

食完飯竟然比我地見到…太陽啊，仲要係好好天嗰隻，又無咩雲呢．而家先知個天，原來係可以轉得咁快架．真係有冇搞錯啊，家陣攞境定贈慶呀．雖然好唔開心，不過無理由唔影番幾張靚啲嘅相先走架．楂左半個鐘都唔洗，就去到豐田女滿別空港嗰間分舖．比原先約定個時間早左成個鐘，攞車又遲左添，真係洩底哂．還車嘅過程真係簡單到你唔信，佢竟然連望都唔望吓架車有冇花到，就駛左去排隊洗車．然後連個姐姐都走開埋，臨行前仲叫我地等佢一陣，都唔知等啲咩．等左幾分鐘個姐姐終於都出返嚟，仲要無啦啦比左一千Yen我添，我一估就估到係Refund，因為佢地係用小時嚟做計算單位嘅，我遲左一個鐘攞車，又早左一個鐘還車，而一日租車係要六千Yen，兩個鐘即係一千Yen囉．不過佢仲方死我地唔知點解，係咁嘗試手指指想話比我地聽，所以我馬上就用國際通用嘅語言”哦”，同埋起勢咁點頭，嚟話比佢聽我明白．之後佢仲用一架好大豐田Van仔送我地去機場添．

大鑊，行李都唔見埋添

一去到機場，我地又再次有番做明星嘅感覺，咪又係因為Checkin　Counter嗰啲姐姐一見我地講英文又係咁笑囉．都幾Work架喎，成個人即時開心哂．Checkin完，時間又真係早得濟，於是乎我就坐低睇吓波咁，而翻譯員咪又去睇吓Souvenir囉．喺翻譯員臨行之前，佢再三叮囑，叫我唔好掛住睇波，要睇實啲行李．我又怕佢長氣，咁咪應佢話：

 

對話

冒險家：”車，得嗰四件行李…咦…點解得三件嘅，做咩之前又話要Hand　Carry，而家又走去寄倉啊？唔驚撞爛晒咩？”

翻譯員：”無寄到啊…”

冒險家：”吓？死喇，溜低左係邊呢？”

翻譯員：”梗係溜左喺下便Checkin　Counter前面．你留喺度等我，我而家落去攞返先．”

 

就係咁，翻譯員就跑左落去喇，不過我就係覺得有啲唔對路，真係唔似喎…無理由Counter啲姐姐唔出聲叫我地架…………啊！好似係溜低左喺送我地嚟嗰架車上面喎．於是我就跑落去話比翻譯員聽喇，然後當然叫佢打電話比豐田問吓佢地執唔執到啦，如果可以就梗係車返過嚟比我地啦，不過佢同豐田個姐姐講左好耐，個姐姐先勉強知道我地留低左啲行李，如果要講到佢明，我唸可能會Miss左班機都未得．咁我地咪唯有行去自己拎囉．好彩都好近吓，行左五分鐘唔洗就過到去，點不知一去到佢地已經搵到．總算有驚冇險，佢地仲好好心咁車返我地去機場添．喺落車嗰陣翻譯員仲串我話：”今次唔好賴話好多行李要Take　Care喇”...

返到機場仲可以行哂所有嘅舖頭，你話個機場幾細吖．入到禁區等梗上機嗰陣仲比我地見到有張Poster　Promote梗藻琴山溫泉芝櫻公園添，最特別都係比我地見到成句用繁體字寫嘅Poster，上面寫住”歡迎來到壯觀的自然景觀的東北海道”，雖然同我呢一編文章一樣咁唔暢順，不過真係出乎我地意料之外囉．之後嘅部份，唔係搭飛機就係搭車，無咩特別，所以我就唔詳細講喇．唯一想介紹一吓池代Sunshine　City地庫嗰間天丼，佢係主要食天婦羅嘅，真係好好食架．個餐牌仲會因應季節而轉變添，真係好有心思架．

我的Picasa相薄

 

行程

網走湖莊　10：22　->　網走站　11：20/12：00　->　女滿別空港　12：33　->　羽田空港　16：45　->　Metropolitan　Hotel　18：00　->　池代Sunshine　City　18：20　->　天丼　19：40/20：10　->　Metropolitan　Hotel　20：40

2006仲夏北海道雲雨霧之大作戰-第八日

六月二日...網走湖莊真係實而不華　－　天氣（天色如常陰暗，一日還有一日凍，能見度：唔夠十米）

原來…我已經Miss左最受歡迎嗰個溫泉喇

天一光我地就馬上再戰江湖，今次我就上天台，翻譯員就落一樓，因為佢地係九點Switch　Over，即係男女湯對調．我臨去之前仲串阿翻譯員話”我而家上去天台露天溫泉喇，你落一樓慢慢浸咯喎，拜拜！”．跟住就一枝箭咁衝左上去喇．上到去喺室內浸左一大輪先可以鼓起勇氣衝出去，點不知一出去我已經想縮沙，因為真係好凍啊．好彩佢地喺正門口放左一個熱啲嘅溫泉，等你可以儲夠熱先上樓梯去嗰個露天溫泉．浸左大概五分鐘，終於比我覺得”我已經充滿力量喇”．嘩！點不知越行越凍，行到一半已經覺得個身凍哂，一上到去唸都唔唸就跳左入去最近嗰個溫泉度．

過左一陣，當我回復左小小體溫之後，我就慢慢行去溫泉邊，亦都係酒店嘅邊緣．唸住睇吓有咩風景睇咁啦，點不知原來我唔企高就咩都睇唔到，但係我只可以維持企高呢個動作五秒左右，因為真係好凍啊…最慘嘅仲係啲溫泉水好大煙，大煙到咩都睇得唔係好清楚．感覺：”有啲搵笨”，唔怪得知浸左成十分鐘都仲係鬼影都唔見多隻啦，不過好似私人包場咁都幾High架．

再浸多十分鐘左右就儲夠熱可以四周圍行一圈，感覺好一啲，起碼有啲View，佢仲有幾個私人浴盆比你自己浸，方便啲有潔癖嘅人，都好得意．不過點都好，一定要企喺度先睇到風景架，但係鬼死咁凍，咪話慢慢企喺度睇風景吖，連好似我咁急急腳咁行一個圈都凍到想死．於是乎咪拿拿淋落返去，再浸多一陣就上房囉．上到房好自然咁同翻譯員傾番個溫泉質素嘅問題，點不知佢話原來我地喺Leaflet度睇到個View係一樓嚟架，唔係天台咁話喎…唔怪知得我都覺得唔係好似啦．佢仲話一樓個View真係幾靚喎…點解尋日我一到酒店唔即刻浸溫泉呢…仲比翻譯員串返轉頭添．

浸完溫泉成個人精神哂，於是馬上火速跑落去食早餐．其一係因為浸完溫泉真係特別肚餓，其二係因為尋日個姐姐話比我地聽，食早餐最好早少少落嚟，因為會好多人喎．點知七點鐘已經Full哂，好彩都唔洗等好耐就有得食，不過我地就發現啲日本仔張Coupon係六點開始，係我地嗰張先係七點開始咋．同尋日一樣，都係嗰個姐姐過嚟招呼我地．啲嘢食嘅質素都係非常咁好，不過今次可能未訓醒，又可能係受左太大嘅打擊，所以唔記得左影相．我淨係記得一樣有中，日，意．同埋好好食，有咩種類我就講唔出．食飽就出去行左一陣門口嗰條商店街，買左少少Souvenir，同埋喺愛奴部族村影左幾張相，因為佢都未開門．如果鍾意手造嘅木擺設就可能會好開心，因為佢有好多間咁嘅舖頭，不過啲款式都好鬼死似．

烏鴉都有人養？

原本想行一陣愛奴部族村架，雖然啲舖頭未開門姐，不過嗰條村都幾靚架，絕對值得停一停，影返張相留念架．之但係真係好多好多烏鴉啊，有人放左一大磅方包餵佢地食早餐，真係唸極都唔明點解會有人咁做．但係最令我地感覺到驚奇嘅係，佢地有一隻好似交通警咁，一路比Signal下一隻，而其他就好有秩序咁一隻跟一隻排住隊咁飛過去攞早餐食，佢地亦好有規矩咁，每隻都只係担一塊方包就走．但係佢地一來飛得好低，二來佢地都好大隻吓，三來佢地亦都好疊馬吓，四來佢地個目的地都係愛奴部族村，所以個情景都幾kuwaii吓，你都咪話唔驚．千其唔好搞錯啊，Kuwaii係[恐怖]而唔係〔可愛〕啊．喺咁嘅情況底吓，我地咪唯有放棄左行愛奴部族村囉，因為我地都仲記得凶兆裏面嗰一幕烏鴉殺人事件．

行左一陣就返酒店CheckOut，然後就向藻琴山溫泉芝櫻公園出發，同我原先嘅估計一樣，真係越向東行就越凍，不過我估唔到啲路會越行越多彎，啲彎仲越嚟越急添，我行梗四十Km，架車都有啲想甩想甩咁，翻譯員仲差啲劏添．再行多一陣我仲覺得越嚟越凍添，而今次仲凍過上一次，亦有一種越行越荒蕪嘅感覺添．行行吓，比我跟到一架車，又係我發揮拓海跟人尾技術嘅時候喇，點不知，唔洗兩個彎之後就轉左入一團濃霧裏面，能見度即刻跌到十米咁上吓．為安全起見，馬上將車速減到四十，同時間開哂大燈同埋死火燈．喺團濃霧裏面行左成廿分鐘先出到嚟，不過前面架車已經唔見左．唔通比我撞到真正嘅拓海？一唔係就係衝左落山架喇，一定冇第三個可能…

冇幾耐之後就比我去到藻琴山溫泉芝櫻公園．喺門口已經覺得細過龍上町嗰個好多．個Parking亦都細好多，仲係爛地嚟添，No　Good．一路行就見到好多No　Dog嘅牌，雖然其他公園唔見呢個牌，不過我地都冇見過有人帶狗入去．天氣好鬼死凍，真係唔係講笑，我真係凍到舊病復發，仲抽埋筋添．我地已經將所有衫都著哂上身架喇，但係都頂唔順，好彩見到門口有啲賣熱食嘅舖頭，咪即刻走埋去買左幾串腸仔同埋熱鮮奶，啪完之後先好番啲．我唸都唔會有人問點解唔買雪糕食架啦，唔係冇得賣架，不過真係唔敢買．入到門口仲見到一對雙妹嘜工作人員凍到彈吓彈吓咁，原先唸住幫佢地影番張相做証，唔洗口講無憑吖嗎．點不知佢地鬼死咁專業，一見到我地用個相機瞄住佢地嘅時候，佢地馬上執番個靚樣出嚟比我地影番張靚靚相，初初都覺得好搞笑，不過唸深一層，佢地嘅專業精神，我真係自愧不如．喺香港做梗服務業嘅你，係唔係都應該學吓人地呢？

講番個公園先．真係冇龍上町嗰個咁大，不過啲芝櫻就種得特別靚，又有Pattern，又有好多唔同顏色，仲有牛牛公仔，又種得濃密啲．呢個公園最有特色嘅地方，係佢有好多遊玩設施，例如吹氣彈床比小朋友玩啦，仲要係密封嗰隻，點凍都唔洗怕啦．又有一條都幾長嘅滑梯，都幾激架，不過咁凍我真係冇心機玩．佢仲喺條路上面放左好多唔同嘅健身設施．不過最多人玩嘅都係迷你小型賽車，速度一啲都唔高，勝在可以比你睇吓風景咁啦，又唔洗行得咁辛苦，不過我地凍到連隻手都唔想申出嚟，所以都係冇玩到．喺呢度比我地撞到東瀛遊嘅團友，佢地仲幫我同翻譯員影左張合照添．不過我地就大頭蝦到唔記得幫翻佢地影添，真係好唔好意思，我喺呢度真係要同佢講番聲”Sorry”．同佢地傾左一陣知道原來東瀛遊嘅團都會去我地去嗰幾個公園，而且價錢都好合理，冇車牌又唔想煩嘅朋友都可以考慮吓架．喺走嘅時候比我地見到一個好大嘅溫度計，上面寫住５．９^oC．不過我地都覺得有啲暖左嘅感覺，即係話今朝喺藻琴山嗰陣，應該連５．９^oC都冇…

之後我地就楂左架車去流冰館，喺去流冰館嘅途中，仲比我地經過一個好搞笑嘅路牌添．個路牌係喺一條T字路口嗰度嘅，亦即係話有兩個方向，第一個方向係寫住”網走”，冇咩特別姐，不過另外一個方向竟然係寫住…”注意”？？？唔通真係有一個地方叫做”注意”？不過我地因為事出太突然，所以唔記得左影返張相添．之但係行左冇幾耐之後又有一個寫住”注意”嘅路牌，雖然係冇咁得意，不過我地都影左張相，叫做有得睇吓咁啦．去流冰館嘅路竟然仲易楂過阿寒湖去藻琴山，真係估佢唔到，另外一個估唔到嘅地方，就係估唔到原來係咁近架，竟然半個鐘多啲就到．

不過流冰館我地就唔係好識欣賞，因為我地都好怕凍，仲要已經凍左成朝添，所以我地冇入去體驗真冰嘅感覺．不過一場嚟到唔入去又好似好笨咁，於是我地就用左一個你唔會估到嘅方法，去體驗啲流冰有幾凍…就係好似細路仔玩自動門咁，係咁企上去個Sensor度，等道門係咁開，啲凍嘅空氣咪係咁流出嚟囉，不過你都唔好講笑，真係好凍吓架，門口嗰兩個姐姐都睇到眼都定哂．原先佢仲有一個露天觀光台比你地去睇吓風景架，不過我地啲老朋友（雨啊）又返左嚟探我地，所以都冇出到去，但係有個日本人真係好勇咁行左出去睇風景同埋影番幾張相，佢部數碼相機究竟係咩牌子呢？竟然唔怕入水？不過佢個Friend都係好似我地咁喺入面欣賞佢就算喇．

真係唔知做咩好

行左一朝又係食午飯嘅時候，點不知同翻譯員喺意見上又有好大嘅分歧，我就好想去網走動感朝市，而翻譯員就話唔想再食生嘢，佢最想食咪又係KFC，不過真係講都冇咁轎，嗰頭講完，就馬上走左一間KFC出嚟，仲喺到正我地面前，佢話冇理由KFC係咁難食喎．係，雖則我都同意佢呢個唸法，不過我真係唔想食囉．見條路都幾大吓，又冇咩車行，咪拍架車埋一邊，然後打哂死火燈，唸住慢慢同佢析掂佢囉．點知比我撞到一個好冇品嘅貨櫃車司機，條路明明有兩條線架，仲要係冇咩車行添，佢又明明見到我打哂死火燈停埋一邊，但係佢仲要係咁用高速，喺正我後面，係咁Boot我，我心唸（又唔係冇第二條線行，你夠薑就唔好Cut線衝埋嚟，睇我做鬼會唔會放過你？）．到最後咪又係要Cut出一條線．我都唔明，佢咁做完之後會肥左架咩…唔通會好開心？所以話賤人嘅野真係邊度都有．

唉！都唔好講咁多呢啲咁無聊嘅人喇，講返食咩先．我地唸嚟唸去都唔知食咩好，但係個肚又真係好餓…當唔知點算好嘅時候，翻譯員就提議去頭先經過喺前面嗰間Bear　Garden．其實我地都唔係好鍾意飲酒，不過講極都講唔掂去邊，我有提議去KFC架，不過唔知點解翻譯員又唔肯去．入到去Bear　Garden，啲Staff好明確咁話比我地聽佢地唔識英文．點清楚法？咪就係唔出聲同埋R哂頭囉，真係係咁R架！不過我地大概知道淨係有Buffet食，仲要睇落唔係好食嗰啲添．我同翻譯員就好決絕咁馬上離開，因為我地都估佢唔會過嚟問我地點解走，如果唔係佢頭先都唔會R哂頭啦．

跟住我就提議去學吓啲日本仔咁打書釘，睇吓啲日本飲食書有咩好介紹．終於皇天不負有心人，嗰本書竟然有介紹我地兩個都好鍾意食嘅蛋包飯．哈哈，終於比我地達成一個雙贏嘅方案喇．拿拿聲背左個電話號碼，然後跑返上車，入左個電話號碼入個GPS度，點不知間舖頭就喺正隔離…真係近得交關，哈哈．去到門口，一望之下仲比我地發現佢有Free　Parking添，但係行左幾個圈都唔係好知個Parking喺邊，因為佢冇電話號碼，用唔到個GPS，所以要看圖識字．最後都比我搵到，其實唔難，不過佢個圖指住個地方，係有一個有料Parking所以我地唔敢入去，後來先知原來嗰兩個Parking係共用一個入口嘅．一入到去間舖頭度，就馬上有一種似曾相識嘅感覺，因為佢個Layout真係好似富良野嗰間朝日之Ataru家，一樣係播住Jazz同一樣好Warm，上到去個老闆仲同個日本仔係咁喺度吹水添，而佢個老婆就梗係喺廚房度煮飯啦，唔洗做咩，日本男人真幸福．而老板娘煮嗰個蛋包飯都係一樣咁好食．

食完飯都唔知去邊好，於是就走左去立北民族博物館，因為入場費比較平，一早都估，唔會有啲咩睇架喇，入面仲少人過流冰館，唔洗一陣就行完，跟住又唔知去邊好，因為我地都唔想去網走監獄，入場費要一千Yen一個人，好貴架嗎，同埋我地都唔覺得監獄會好睇得去邊．原本我都想去知床，我地冇Check過GPS，不過大概都知唔會少過兩個鐘，一來一回都好夜喇．就係咁，我地就好無聊咁打左一陣書釘，點不知比個阿嬏扮掃地（係咁喺我地企嘅地方掃完又掃仲唔係扮？）趕我地走，我地就梗係好厚面皮咁當唔知．打多一陣書釘，然後就去酒店Check-in．

網走湖莊真係比想像中好得多

間酒店都幾OK喎，雖然唔夠阿寒湖嗰間咁Grand，又冇一條假嘅船喺Lobby度．不過佢個Lobby都好有氣勢，因為喺正個網走湖隔離，真係幾好View架，最衰嘅就係有一班日本仔喺度起勢咁煲煙．唉！唯有拿拿淋返上房．房間都幾OK，雖然唔係好大，不過佢地都分開廁所同浴室，亦都有一個Area比你Set頭，但係就冇凳坐囉．放低哂啲行李我地又再次出動，今次嘅目啲地係…酒店門口．冇他嘅，一出門口就係網走湖，咪唸住可以行吓睇吓風景咁囉，浪漫吓吖嗎．唉！點知大風到不得了．有幾大風？啲風可以吹到我同翻譯員都變成超級撒亞人咁姐．咁咪唯有嗰頭出左門口，呢頭就雞咁腳咁走返入酒店囉．真係Bad　Luck．冇咩嘢做，我就梗係又上吓網睇吓啲公事OK未啦，而翻譯員就梗係返房執吓啲行李啦，唔洗做咩，哈哈．

佢上網嘅地方都幾得意架，成個電話亭咁．上左一陣網，之後又係Dinner　Time．當啲餸嚟齊之後真係嚇左我一跳．我咁大個仔都未試過一個人食哂一隻蟹架．唉！點解一個人食一隻蟹都唉？實不相瞞，我唔食蟹本來就係因為懶，唔想DO咁姐，不過翻譯員自身都難保，我咪唯有自生自滅囉．一唸起，個心都酸埋，唸吓唸吓，竟然比我唸到自制Kani丼，真係有啲天份．同隻蟹搏鬥左半個鐘多啲，終於比我完成左我嘅自制Kani丼，真係好食到痺．而翻譯員就比較鍾意成隻食，不過佢都食左半個鐘都食唔哂，仲要我碗自制Kani丼加料添．除左個Kani丼之外仲有一啲前菜架，蝦Sashimi同埋燒銀雪魚咁．啲嘢食全部都好好食，除左一個好K型嘅帶子燒之外，睇落仲以為好好食添，點不知好鬼死腥．

飯前飯後當然唔少得溫泉浴啦，呢個溫泉就真係夠熱喇，佢同湯之川渚亭溫泉酒店嘅私人露天風呂都差唔多咁熱，不過浸耐少少就發覺湯之川渚亭溫泉酒店係熱少少．佢都有一個露天小風呂，不過真係細到好似三四個浴缸咁細．仲要周圍都比啲圍板圍到實一實，啲圍板仲好鬼死高添，真係咩都睇唔到囉，都幾把鬼架．

我的Picasa相薄

 

行程

阿寒湖鶴雅酒店　->　阿寒湖商店街　08：10/9：14　->　藻琴山溫泉芝櫻公園10：40/11：25　->　網走流冰館　12：10/12：50　->　網走站　13：40/13：14：00　->　立北民族博物館　14：45/15：16　->　網走湖莊　15：35

2006仲夏北海道雲雨霧之大作戰-第七日

六月一日...狐狸仔都好Cute吓喎　－　天氣（陰陰地咁，不過越來越凍）

原來美瑛嘅四季彩之丘仲靚架

一早七點起身食早餐，好奇怪，唔明點解係食生果做頭盆．跟住就係好正常嘅美式早餐，即係腸仔抄蛋加沙律，仲有個餐包食同埋有杯好好飲嘅奶飲咁囉．不過佢地都唔知點解興早餐飲湯…我地都覺得怪怪地咁，不過味道都唔錯．其實我地都仲未決定跟住去旭川定去邊好，因為尋日去Farm　Tomita都冇想像中咁靚，所以更加唔知去唔去四季彩之丘好，雖然我個人就好想去旭川個動物園，因為好似話同其他動物園唔係好同，話好似可以比到你好近啲動物咁話喎，之但係又真係好想睇花．唉！點算好呢？

最後我都係決定左去睇花，而旦仲成功遊說到翻譯員去四季彩之丘添．因為好順路，而且我真係唔死心，因為睇人地啲遊記，個個都話六月頭富良野係應該有啲嘢睇架，冇理由係咁架嗎．一如以往，GPS又話要下晝一點先到四季彩之丘，都咁多日咯，冇理由仲唔知個時間係流架啦．一個鐘多啲就到左美馬牛小學，我就覺得呢個竟點冇咩特別，所以只係停一停車，影張相就算．再楂多幾分鐘就去到四季彩之丘，四季彩之丘個門口比較平凡，冇咩特別，富田農場個門口有氣勢好多．

初初見到個門口都有啲驚自己又揀錯架，點不知一入到去差啲仲嘩一聲叫左出嚟添．佢喺門口已經擺左一個好Cutie嘅稻草人比人影相，後面又係延綿不絕嘅田野，真係好好Feel．佢地仲種左好多好多鬱金香，仲有少少薰衣草添，有啲唔知佢叫咩嘅花，好似係太陽花，都幾靚架．佢地賣Souvenir個度仲放左一個真嘅蜂巢，當然係冇蜜蜂架啦，唔好講笑，我咁大個仔都未見過真正嘅蜂巢係點，今次真係眼界大開．唔洗講都知跟住要睇下Souvenir啦，不過都算好忍得手架喇，淨係買得少少乾花就肯走喇．

原來狐狸係咁Cute架

其實佢都好心急，因為下一站就係全個行程嘅重點之一：龍上町芝櫻公園．上到車第一時間Set個GPS去龍上町芝櫻公園睇下要幾耐，都知唔準架喇，不過冇唸過要五個鐘姐．之前已經覺得去富良野嘅路好原始，點不之原來去龍上町嘅路仲原始．行左個幾鐘，見到路邊有好多地方，都鋪滿一層層灰白色嘅物體．睇落都幾污糟吓，不過翻譯員一眼就認出係〔雪〕嚟架喇．我咁大個仔都未見過真嘅雪係點架，真係幾開心吓，不過翻譯員就係咁話我大鄉里喎，車！未見過雪唔得架．其實早就應該估到係雪嚟架喇，因為我地喺架車入面都發現越行越凍，仲有就係原先我地放左少少朱古力喺架車前面，唸住肚餓可以攞嚟食，方便啲吖嗎，但係喺函館嗰陣，比太陽哂到溶溶地，點不知一嚟到，啲朱古力就硬番哂，你都咪話唔凍，真係成個雪櫃咁，唔怪得凍到我地都要馬上著哂啲衫上身啦．

原本都考慮落唔落車睇吓咁．不過睇真啲之後就打消左呢個念頭，因為真係好〔污糟〕啊．行吓行吓仲見到對面山頭原來都鋪滿哂雪添，都幾靚吓，最後決定左喺一個最好View嘅地方停低架車影番幾張相就走．停車影左一張相之後就直情想搞低司機隔離個窗去影，因為隔左個窗點睇都好似唔係好清咁，正當我隻手放喺個電動車窗制嘅時候，我睇到有一隻狐狸企到正喺門外面，又望到我實一實，佢仲要係企得好近個隻添．我梗係唔放過呢個機會叫翻譯員幫佢影番張相先喇：

 

對話

冒險家：”還掂都冇車，不如搞低我隔離個窗再影多幾張相，隔住個窗好似唔係咁清咁．”

翻譯員：”好吖．”

…

冒險家：”嘩！有一隻狐狸啊．”

翻譯員：”喺邊度啊？”

冒險家：”呢，咪喺正車門外面囉，佢而家望到我實一實啊，好彩冇開窗姐．”

翻譯員：”~~~~”

冒險家：”佢好Cute啊，好似未訓醒咁，啲毛亂七八糟架喎．”

翻譯員：”~~”

冒險家：”快啲攞部相機同佢影番幾張Close　Up啦”

翻譯員：”好驚啊，〔快啲開車呀〕！！！！！！！！”

…

 

我收到Order之後就馬上開車駛前啲喇，因為我真係唔係好死心，想同佢影番幾張沙龍咁囉．駛到一個安全距離之後，我又停低左架車，正當我問翻譯員攞架相機唸住今次親自操刀嘅時候，佢竟然向住我地跑過嚟喎．翻譯員見到咁嘅情況就梗係又叫我快啲走啦，我見佢咁驚咪又再駛前多啲，希望用最後機會睇吓可唔可以最少影到一張咁多啦，點不知已經到左個灣位，仲有架車係後面嚟梗添，唉！就係咁，我地就白白咁浪費左一個咁好嘅機會，同一隻野生狐狸影番張沙龍喇．

其實一路上都有好多動物沒出注意架喇，不過個公仔係隻鹿嚟嘅姐．之前仲有狐狸出沒注意啊，熊出沒注意啊咁．喺富良野仲有好Cute嘅松鼠出沒注意添．翻譯員嗰時仲係咁話都唔知係唔係真嘅添，一路都淨係睇到牌，連鬼影都唔見多隻咁話喎．你話如果跑隻熊出嚟真係唔知會點．因為一隻狐狸連一隻狗都打唔贏，仲要見到佢鬼死咁細隻添，就算要同佢打過都唔一定會輸，所以我先至有咁鎭定，不過如果出嚟嘅係一隻熊，我相信我都未必有咁鎭定，如果架車比佢隻熊掌打中，我唸都可能頂唔順，想信可能會反…唸起都驚驚地．

龍上町芝櫻公園真係好大架

行多半個鐘左右我地知道已經好近個芝櫻公園，千其唔好誤會，我地一眼都冇望過個GPS，原因其實係好多人都喺自己屋企門口種左好多好多嘅芝櫻，唔洗問阿貴都知應該離芝櫻公園唔遠啦．我地大概喺１１：５０就到左芝櫻公園．其實離遠我地都知道已經到左架喇，因為成坐山都種滿左芝櫻，都好壯觀吓．

佢地都好好服務吓，喺停車場入口已經有三四個阿姐喺度賣飛比楂車入嚟嘅朋友．其實佢個Parking係唔洗錢嘅，所以停車場門口係冇閘嘅，嗰四個阿姐係特燈企出嚟方便楂車嘅人，真係細心．一落車就馬上做左一個指定動作，就係買雪糕食喇，因為食過啲唔好食嘅薰衣草雪糕，所以今次都唔敢再試咩芝櫻味嘅雪糕，而係揀左比較穩陣嘅Vanilla雪糕喇，都好好食喎，無他嘅，北海道嘅雪糕都係比較滑嘅．喺門口嗰度仲見到，原來佢係有八大個唔同嘅主題公園架，我真係有個衝動想去哂所有嘅公園，可惜今日嘅行程都係比較緊湊．

講返個公園先．個公園嘅面積真係幾大，我地只可以行左五份之三左右，不過真係好多芝櫻，行到餓餓地就搵左一間比較多人嘅小食擋醫吓個肚．原先都好開心吓架，因為間小食擋係比啲芝櫻包圍住，真係幾靚幾有意境．不過今次我比翻譯員老點左，佢就叫左個义燒拉麵比自己，而就幫我叫左一個天婦羅烏冬．點不知個天婦羅烏冬係冇餸架，嗰啲其實係炸天婦羅嘅脆漿，亦即係話我係食梗啲炸左嘅粉囉…之後唸住叫枝波子氣水沖喜吓咁啦，點不知嗰枝蜜瓜味波子氣水仲難飲過一枝真嘅藥水，我而家真係信咩叫禍不單行喇．

行多一陣都唸住走架喇，點不知個後山原來別有洞天…首先你離好遠都已經見到一條金色嘅路．喺路嘅兩旁就種滿左好多好多嘅鬱金香．喺半路上仲有一條小木橋，去到最後仲有一個小涼亭，真係夠哂詩情畫意．就係咁，我地就喺呢個咁靚嘅公園玩到一點先走．真係好多謝網友Pancy喺北海道互助社群話比我地聽原來龍上町呢個芝櫻公園真係咁大同埋咁靚嘅，果然唔係浪得虛名．

如果早啲嚟上湧別町個鬱金香公園就好喇

跟住我地就一心想睇吓個上湧別町鬱金香公園，係唔係好似Dragonman喺圍威喂講到咁靚呢．用左大概一個鐘嘅時間就到左呢個鬱金香公園，個公園真係好大又好靚架，所以真係好多人嚟．喺門口已經知道Dragonman一啲都冇老點到．真係好靚，差唔多你講得出嘅顏色佢都有．可惜我地可能遲左少少，好多鬱金香都已經謝謝地．佢仲有一個賣嘢食嘅地方，嗰度除左Souvenir同小食之外，仲有一個小型嘅展覽館，嗰度放左好多攝影比賽嘅得獎作品，主提當然係呢個鬱金香公園入面啲花啦．好多作品都好有水準，啲花仲好靚添．不過我只係比較鍾意其中兩張，因為佢地攞嘅景，同我喺札幌影電視塔都有啲似，所以我都話我影相都好有天份架啦．

對話

翻譯員：”吹夠未啊，你可以影相唔手震先講啦．”

冒險家：”…”

 

我地入到去買小食嘅地方其實係相取吓暖，因為真係好凍啊．喺臨走嘅時候仲比我地聽到廣東話添，點不知一望之下，發現原來係喺札幌Kani將軍度撞過一次嗰個有錢Family啊．行到三點左右，我地就出發去阿寒湖鶴雅酒店，沿途仲比我地見到一個好大嘅摩天輪添．喺一條長命斜嗰度見到兩個中學生喺度騎單車，真係後生可謂，因為嗰條斜路真係好斜吓，冇幾耐之後仲比我地見到一隻狐狸喺度跑梗添，可惜後面有好多車吓，所以唔停得車，影唔到相．我喺度唸，唔知佢係唔係追梗頭先嗰對後生仔呢．再之後又見到一間七仔，本來見到七仔冇咩特別，但係佢背脊仲有一個種滿芝櫻嘅山添，都唔細架，不過唔知係唔係公園嚟嘅呢．我地覺得攰攰地，於是就入左間七仔去吓廁所咁啦，點知比我地見到有沙律漿賣喎，梗係唔洗問阿貴，幫佢影番張相先，費事下次想要沙律漿嘅時候又唔知比啲咩我地．

阿寒湖鶴雅酒店真係好靚

唔洗六點，我地就去到阿寒湖鶴雅酒店．一入到個Lobby已經覺得間酒店好有Class．佢仲好似拉斯維加斯嗰間威尼斯人一樣有一條人造河（仔）添，條河（仔）當然同威尼斯人嗰條差好遠啦，起碼Size上有好大嘅距離先喇．我地揀呢間酒店係因為佢係溫泉酒店排行榜排第一，就連蔡瀾都話好嘅，應該有翻咁上吓呱，所以咪豪佢一次咁多囉．點知一入到房真係嘩一聲叫左出嚟．間房真係好大架，仲好靚添，佢仲要分開廁所一間房，浴室一間房，連化妝間都係另外一間房，佢個所謂嘅玄關仲大到可以放一張茶几同兩張椅添，你都咪話唔咵．因為我地真係好肚餓，所以就馬上去食Dinner喇．

一落到去就見到我地食Dinner　Buffet嘅地方，不過唔知點解佢要我地喺門口等左一陣，但係我地就見到其實佢地係有好多位．當我同翻譯員喺度估發生梗d咩事嘅時候，突然之間比我地聽到有人用普通話跟我們說話（為左話比睇梗嘅你地聽我地已經轉左台，我以下嘅遊記將會用比較文雅啲嘅文字）．

 

對話

服務員：”你們好．”

翻譯員：”吓？”

冒險家：”啊！你好．”

服務員：”請跟我來，這邊請．”

…

冒險家：”你為什麼會知道我們會說普通話呢．”

服務員：”因為他們今天早上跟我說，有一對從中國來啲遊客會到我們飯店來，他們還叫我要好好招待你們．”

冒險家：”哦…”

 

然後服務員小姐就很詳細地介紹給我們聽周遭的食物．原先還想問他來北海道多久，習慣這邊的生活嗎，從那兒來，還有是否結了婚．不過其實我們的普通話都是一間很有限的公司，所以已上所有的問題，都只好放在心裏面．

唉，頂唔順喇，都係轉翻台先．呢度啲食物種類，係我喺北海道食過咁多間酒店裏面最多架，有日本菜啦，中國菜啦，意大利菜啦．食物嘅質素亦都係最好嘅．一坐低已經有一個前菜食，雖然唔知係咩，不過都幾好食．日本菜方面有唔少得嘅Sashimi啦，最特別嘅Sashimi係鯨魚同鹿肉，都幾好食架．又有燒日本和牛啦，啲和牛真係好好食架，我仲Encore左三次添．仲有啲日本熱食啦，不過我同翻譯員都唔多好，所以冇食到．最特別嘅仲係有個自助勝手丼Corner比我一展所長，講你都唔信，我造出嚟嘅勝手丼連翻譯員食過都話正啊，簡直係色香味具全啊．除左小食亭嘅嘢食之外，佢地仲不時好似香港啲茶樓咁，有推車仔點心，我地就食左自制豆腐同咖哩鹿肉包，個咖哩鹿肉包有啲似五香肉丁，都幾好食，不過就唔係咁特別姐．而個自制豆腐就真係好難食吓，仲難食過百福豆腐，一啲都唔滑囉．

中國菜方面呢，竟然有蟹黃翅喎，我地就梗係唔執輸食番碗先啦．雖然味道都唔錯，啲翅仲好大條添，不過我都係覺得香港嗰啲會好食啲．佢仲有咕嚕肉，呢個就真係同香港食嘅差唔多味道喇．其實仲有好多其他餸，不過我地已經飽到再食唔落喇，就連意大利菜都食唔落．不過點飽都仲有Buffer去食甜品嘅．食飽飽就梗係馬上走人啦，上房小休一陣，點知個姐姐馬上跑出嚟同我地講”謝謝”同”再見”，就連其他日本Waiter都馬上學佢同我地講”再見”，真係幾搞笑，連佢地自己講完都係咁笑．

小休完一輪就唸住落去浸吓溫泉咁囉，夜晚時段男湯喺落樓下，女湯喺樓上．於是我就同翻譯員分道揚鑣，佢上樓上，我落樓下．佢地都幾古怪，喺男更衣室裏面就有一個嬸嬸喺度，佢都好忙吓，我睇得出佢係唔會走添．最後我下左好大嘅決心先可以除哂所有衫，跟住就用九秒九嘅速度跑入去浸溫泉．一浸之下就咩心機都冇哂，因為真係太．．．〔凍〕．正確啲嚟講應該係話一啲都唔熱．不過佢地就有一個叫咩蝙蝠洞嘅水力按摩溫泉，都幾特別架，不過都係唔熱囉．原本想出外面個露天溫泉八吓，不過我個身都仲係好凍，而且出面黑馬馬咁，應該咩都睇唔到，所以就放棄左呢個唸法．唉，真係有啲失望．當翻譯員返到房，佢話佢都有上去天台個露天溫泉，不過黑馬馬，咩都睇唔到，我仲好開心咁話比佢聽我冇出去，因為我都估到係咩都睇唔到添，而我同佢都覺得個溫泉真係唔夠熱囉…點知……唉．

我的Picasa相薄

 

行程

Pension　Furanui　8：24　->　美馬牛小學　9：05　->　四季彩之丘　9：08/09：31　->　龍上町芝櫻公園　11：46/13：10　->　上湧別町鬱金香公園　14：10/15：05　->　阿寒湖鶴雅酒店　18：00

2006仲夏北海道雲雨霧之大作戰-第六日

五月三十一日...一早就出發去富良野喇　－　天氣（越來越陰）

原來油站都有分係唔係二十四小時架…　好眼訓啊…　ZZ．．Z．．zz．．z．．

天都未光就要起身，因為尋晚Check過GPS話去富良野要成九個鐘…為免楂車唔夠精神，我地尋晚都好早就訓．而今朝一早起身，第一時間就係去浸吓先，食完早餐就再浸一次，醒吓神咁囉…喺上國道之前第一個難題就係要入油．可能你會話，車！入油姐，有幾難啊？原本我地都係咁唸，所以尋日經過好多油站我地都唔去入，仲覺得係小事一件姐．不過當我地經過幾個油站都冇開嘅時候，我地先知道原來油站唔係二十四小時架．瀨嘢添…早知尋日入左先啦…

好彩喺臨上國道之前，終於比我地搵到一間油站有開．我地拿拿淋楂架車入去，唸著入油啦，點不知一個Staff都冇嘅，自助油站？瀨嘢喇…冇入過添，真係唔識點入喎．係我地勁R頭嘅時候，竟然有一個Staff行出嚟教我地點做，好彩姐！就係咁，我地就好順利咁入完油喇，不過部機淨係嘔返一張Receipt出嚟．咁我啲錢呢？喺呢個時候，個Staff又再次出嚟喇，原來係要攞張Receipt去比部機Scan個Barcode，跟住部機就會自動找錢架喇，真係大鄉里．

比人睇左全相添…　唉！真係黑仔到痺啊

天氣真係好差，仲落住雨添．好彩我地行得快過舊雨雲，唔洗一陣，就停左雨喇．原本翻譯員話過唔訓陪我，唔洗等我咁慘，自己一個人楂車，點知行行吓都係頂唔住睡魔急Call…唯有自己頂梗上啦．差唔多行完道央自動車站嗰時，我都有啲頂唔順同埋都幾急吓，好彩我記得仲有一個PA可以停吓同去吓廁記咁．果然係冇幾耐之後就比我地見到有一個PA，唔洗講多，我梗係馬上就楂架車入去Take　a　Break啦，如果唔係撞車都有份．喺我正在喺廁記辦梗公嘅時候，忽然之間有個清潔阿嬸撞左入嚟…吓？唔係呱？妳唔係咁都聽唔到啲咁雄壯嘅水聲吖嗎？即係有人正在辦公啦．仲入嚟？有冇搞錯啊．唉！就係咁，我就比人睇左一次全相喇．

小休左一陣之後，就懷住沉重嘅心情，繼續上路．再行多一陣就離開左道央自動車道，大大話話都行左成四個鐘．當架車開始駛入國道時，心情又再次沉重起嚟，因為個天真係好陰吓，陰到好似夜晚一樣，搞到個森林好鬼死陰森恐怖．原本個森林已經係好原始吓架啦~~最驚嘅仲係周圍一架車都冇，好似楂梗入去一個死城咁（有冇睇過史提芬”驚”嘅電影啊？）．你都咪話唔驚，我而家再同翻譯員傾返，佢都話而家唸返起都有啲驚啊．

因為之前睇過其他網友嘅Comment，知道富良野一帶有好多快相，我地呢啲貪生怕死嘅司機，梗係用一個安全到冇得再安全嘅速度行車啦．如果一路都冇車喺我前面嘅話，我唸我唔洗七點，都要六點先入到富良野，因為嗰條國道嘅車速限制係四十Km…真係有冇病啊？好彩，唔洗幾耐就有一架應該係酒店嘅車喺後面高速駛近，我第一時間就將架車駛埋一邊，等佢可以行喺前面幫我掃雷…但係我都行得好貼吓，連翻譯員都話我比到好大壓力前面個司機喎…冇計啦，鬼叫聽過啲咁嘅Comment同埋又真係唔係好熟路咩，有人帶路就梗係點都安心啲架嗎…

行左半個鍾左右，終於都要同佢分道揚鑣．再次懷住戰戰兢兢嘅心情繼續上路．但係個天就越來越陰，咁都不特止，個森林仲越來越原始添．真係好鬼死恐怖架．繼續喺個咁陰森恐怖嘅森林行多一個鐘多啲，就比我地到左富良野，Yeah．對富良野嘅感覺係：都幾原始吓．一入到富良野，第一件事就係Set返個GPS嘅目啲地去朝日之Ataru家．去嗰度有咩做？梗係食飯啦！

武林絕活　–　重現江湖！

唔洗五分鐘就去到喇，望吓望吓先發現原來我地住嗰間酒店就喺正後面，又會咁啱嘅．不過我地還掂行李都係放喺架車度，所以就唔洗Early　Check-in咁囉．講返間餐廳先，個門口好特別，特別在於要行一條都幾長嘅樓梯吓，唔知係要避雪定係要避動物呢？一入到去就有一種好Warm嘅感覺，啱啱有一個日本人同老板娘喺吧檯度吹水．但係我冇咩心情慢慢欣賞，因為我個肚裏面已經有九十九隻大笨象喺度奔跑一樣，仲要係好激烈嗰隻．亦因為翻譯員嘅Taste其實真係好好，（我每次照鏡都有咁嘅感覺…）所以我好放心咁吩咐左，叫佢幫我Order埋食咩之後，馬上用極速跑入Toilet…

一打開門，真係唔敢相信喺我眼前出現嘅係一個景象…痞廁？係真唔係啊？痞廁呢樣野對於我嚟講，等於死刑…要一個已經脫離左痞廁生涯二十幾年嘅我，再一次進行一次咁嚴峻嘅考驗…最大鑊嘅仲係要喺一個咁緊急嘅時候，根本就唔比我有任何嘅選擇…莫講話選擇，根本連唸嘅時間都冇．唯一可以做嘅就係試，唔得又再試，唔係講笑，真係唔成功左好多次，每一次都只可以維持短短一兩秒鐘，放低一舊都唔夠時間啦…時間越來越唔容許我再有幾次嘅失敗…個心真係越來越急，可以點算呢？

突然之間靈光一閃，比我搵到一個驚人嘅發現…好彩我阿媽生得我夠…長．千其唔誤會，我而家係用台灣用開嘅形容詞…即係高．唔好睇少高呢樣野，有陣時真係好有用架．今次我就利用我身高呢個優點，先可以駛出我都冇用左十幾年嘅絕活…[壁虎工]就係因為我夠高，所以我對手就自然長啲啦，哈哈哈哈哈…真係好成功，我果然不失為一個武學奇葩．真係唔敢想像，如果我自幼習武，而家我嘅成就會係點…呵呵呵…正當我喺度滿心歡喜咁自我陶醉嘅時候，突然之間我就再笑唔出…取而代之嘅係一張驚慌嘅面孔．

當我睇見佢地係用梗嘅廁紙，係同其他酒店一樣，都係好似沙紙一樣咁粗嘅時候，我真係笑唔出…仲記得我啱啱係札幌京王嘅時候，我仲特燈唔用佢地個自動洗Pat　Pat器，點知一試先知錯，因為咁，我個八月十五仲痛左幾日添，而家先叫做好番啲…唉！鬼叫緊急到我連包Tempo都唔記得帶入去咩，又唔可以唔做好清潔就出去…唯有頂硬上啦…呢一次嘅損害情度，比上次更甚，可能係因為舊傷未全愈嘅關係呱，今次可以形容為阿士豪大災難，阿士豪其實係英文嚟架…

而家我先知比人傷害個後庭係會有幾痛嘅…出嚟之後，我已經雙腳無力…翻譯員仲不以為然，係咁同我講話佢點菜之後，老板娘就一邊準備我地嘅食物，一邊繼續同個喺吧檯坐嗰個日本人吹水，真係有啲驚佢落錯料咁咁咁…不過佢講完之後都覺得我有啲唔Alright，仲好聰明咁知道係咩事添．不過佢除左無奈之外就做唔到啲咩…而我就唯有一邊聽住佢播梗嘅Jazz輕音樂去舒緩一吓，一邊等食喇．

食物終於到左，翻譯員叫左一個平啲嘅富良野奄烈咖哩，而佢就幫我點左一個强烈推薦嘅漢堡扒咖哩奄烈，睇張相好似我嗰個靚啲，不過實物就係翻譯員嗰個靚好多．味道方面都係一樣，佢嗰個係因為用咖哩飯嚟做，所以真係好好食．至於飲品方面呢，翻譯員就叫左一杯提子汁，另外一杯就唔知係咩汁，飲完都係一樣唔知，佢話因為又係喺Menu度Highlight左，所以試吓喎．不過我覺得富良野嘅果汁同我喺小樽食嗰個夕張哈密瓜一樣都係比較甜，唔係好啱我口味．最驚喜嘅竟然係有甜品送，雖然唔知係咩嚟嘅，不過個甜品都好好食吓．食完之後翻譯員先敢入去廁記，唸住只不過係開小，仲要隔咁耐喎，咩味都走哂啦．點不知啲味都仲係未散都不特止，個榙仲好嚇人添，佢話直程臭到差啲暈添…

富田農場　–　都幾靚，彩香之里就唔知道喇

食完之後就向富田農場出發．一去到都見到幾多人吓，仲要好多都係講普通話添．我地第一時間梗係Search吓有冇薰衣草睇先啦，一早就知唔會有驚喜架喇，因為一來已經知道六月頭唔係薰衣草嘅季節，二來今年暖得比較遲，所以啲花應該係會再遲一啲先開．一睇之下，真係只可以見到一片田，冇咩特別囉．都有少少唔知咩花，亦有啲鬱金香，不過大部份都謝哂，仲有少少薰衣草咁囉．但係咁喎，啲薰衣草就好似係少朋友咁，好細，一啲都唔顯眼．

喺冇咩特別嘢睇嘅時候，又見到佢地有個咩蜂蜜布丁，睇落個樣仲幾唔錯添，咪唸住試吓囉．點不知一食之後成個人都開心哂，嘩！真係冇誇張，你試吓就知我冇老點．行吓行吓就見到有個溫室，都幾多人入去架．我地呢啲香港人就梗係做阿羊生羊太，人去我去啦．入到去竟然比我地見到啲真正嘅薰衣草，即係已經成長嘅薰衣草．我覺得成長左嘅薰衣草就真係靚好多．行完之後，最後就梗係Shopping啦，入到賣Souvenir嘅地方，見到佢地都好比心機裝飾，個大廰有一坐好大嘅Setting，都幾靚吓架．Shop完之後就試吓人地話好好食嘅薰衣草雪糕，感覺好…Artificial即係人工同埋好似食梗藥水咁，我覺得病左先食會好啲，可能可以快啲好返添．

行完之後就去彩香之丘，點不知去到佢都仲未開．都不特止，連花都唔見多一朵，根本就未開始準備．本來唸住去旭川個動物園架，點知個GPS話要成五點先去到…就算減一半都要成四點先到，有鬼用咩，四點人地都Close囉，就算我地三點半去到，都冇咩時間行喇，不如唔好去好過．

又嚟料？好彩驚喜一浪接一浪

左踱右踱都係唔知去邊好，到最後唯有去我地原本唸住夜晚先去嘅Ningru　Terrace．大概只要半個鐘嘅時間就去到Ningru　Terrace，其實個門口都幾明顯吓，不過我真係唔知點解搵極都搵唔到，仲搞到翻譯員係咁發老脾添．事原係喺Prince　Hotel門口有一個牌寫住Ningru　Terrace點去，不過當翻譯員叫出聲嗰時，其實個牌啱啱喺正架車隔離，我梗係停唔切啦．但係我已經比一般人用少左一半嘅時間，亦即係喺一秒內就將架車停低左，不過同個牌嘅距離真係遠左少少，翻譯員已經開始嚟料．原本我都想開後車返落去，不過因為嗰條係一條上斜嘅路，而且又係喺正個彎入面，咁樣後車法會好危險吓．於是我就放棄左呢個唸法，然後我就唔理佢繼續開車，點知見到第二個牌，咁我梗係開架車去睇吓有冇發現喇，點知嗰個牌只係講你可以由呢條路上去Prince　Hotel．翻譯員就好唔老嚟咁問我”你而家想點啊？”．我都係冇理佢然後再繼續開架車入去，因為我相信唔會太難去，點知行左冇耐，佢就有發現，係咁話：

對話

翻譯員：”呢，咪喺嗰度囉”，

冒險家：”邊度啊？”

翻譯員：”呢，咪喺前面囉”，

冒險家：”邊度啊？”

翻譯員：”呢，咪喺前面囉”，

咁我咪係咁行，係咁行囉．點知突然間我聽到：

翻譯員：”喂，你又想去邊啊？”

冒險家：”你話喺前面吖嗎”

翻譯員：”唉！後面啊”

冒險家：”有冇搞錯啊，你頭先話係前面架嗎…”

終於我都搵到喺邊，停低架車之後就粒聲都唔出咁自己行落去，基本上今日都冇停過落住雨，不過我都係冇理，通常我唔講嘢只有兩個原因，一係我真係冇嘢講，不過真係比較少有．再唔係就係好嬲．喂！大佬！一次係咁，兩次都係咁，三次喇，仲有咩好講啊．好！就當佢之前嗰兩次係因為對腳痛，咁今次呢？正所謂事不能過三，實在太過份喇，你識嚟料我唔識咩？我唔理佢一枝箭咁行落去，不過真係冇咩心情睇風景．佢都知瀨嘢，不過面子問題，唯有話比我聽前面嗰間Café啲嘢食都唔錯，然後就馬上帶路，唸住改變視線，我抱住睇吓佢想搞啲咩嘅心態跟佢入去．

入到間Café有一種好Warm嘅感覺，佢係自助形式嘅，首先係要Order，我地揀左佢推介嘅Baked　Milk，然後就當然係比錢啦，跟住就係等喇．係等梗嘅時候，我都係一句嘢都冇講，然後就梗係拎啲嘢返去慢慢嘆啦．當我見到杯Baked　Milk嘅時候，啲火已經唔覺唔覺熄左一半，到我試左第一嗒嘅時候，就冇左一大半，然後到翻譯員將佢嗰杯都比埋我食嘅時候，就咩火都熄哂．杯嘢真係好好味架，首先，最上面嘅係一層焗過嘅奶，好香，有啲燒焦嘅味道，都幾香口．第二層係半固體，有啲似中式燉蛋，好好食架，不過呢一層個厚度就少左啲，如果唔係可能會再好食一啲添，最後就當然係熱嘅鮮奶啦．真係好似Kinder出奇蛋一樣，一次過可以比到你三種感覺…

Pension　Furanui一啲都唔似民宿囉　直情成間酒店咁　不過都好重煙味吓

真係好神奇，飲完之後真係咩火都熄哂…不過可能係太早喇，我地都覺得夜晚呢度會靚好多．坐多一陣就打道回府，去Pension　Furanui進發，Checkin去也．喺一路去酒店嘅時候，我就一路話不如今晚食完飯再嚟過，當食甜品吖嗎，不過翻譯員就點都唔肯，唉！冇計．一去到Pension　Furanui個門口，起初都有嘩一聲，不過唔洗幾耐，就變成唉一聲，因為我發現左，原來我要將我地嗰兩大箱行李搬上一條大概有十級嘅樓梯，先可以入到去個Lobby度…幾經千辛萬苦，終於將所有行李搬哂上去．間酒店其實都唔係好大，但係都有個Lobby比客人坐，不過佢地個Lobby比一般酒店優勝之處，係在於佢放左好多私人擺設喺個廳入面，令人有一種好Warm嘅感覺，仲有佢放左張熊人皮喺廳中間添．不過最敗筆嘅，係佢地應該食煙食得好勁吓…

當翻譯員Checkin梗嘅時候，我就按照個哥哥仔嘅指示將架車拍喺佢地個無料爛地Parking嗰度．當我拍完車返上去嘅時候，翻譯員就同我講原來佢地有CCTV望住個Parking，比我覺得佢地啲設施原來都幾好，真係唔差得過真正嘅酒店．Checkin完之後，翻譯員竟然話比我聽佢特燈Book左二樓，因為地下所有房間都冇私人廁所喎…即係話我要將嗰兩箱行李搬上二樓？今次好似仲唔止二十級樓梯添…

幾經千辛萬苦先搬哂所有行李上房．但係一入到房就聞到好强烈嘅煙味，真係影響哂我地嘅心情．距離食飯嘅時間仲有成個鐘，咁啱比我睇到佢地有得上網，我就梗係唔會浪費時間喇，馬上走去上吓網咁，不過佢部機都幾舊，仲係用梗Window98添．價錢都幾合理，不過部機就慢左少少咁囉．不過上完網之後就唔係好安心，因為公司嘅事情都仲好似係”未解決”咁，不過都冇計啦．

當我上完網之後，翻譯員都啱啱完成左佢收拾行李嘅壯舉．時間真係啱啱好，仲差少少就到六點．又係食晚飯嘅時間，冇錯佢地係比較早食晚餐嘅．其實我地頭先都估會唔會包酒店架喇，點知真係比我地開口中，全間酒店得我地一檯客．都唔係我地聰明，只不過因為我地入屋係要換拖鞋，所以一睇門口有幾多對鞋就知有幾多人客啦．不過咁都好，啲人可以集中啲招待我地吖嗎．

初初都唔睇好架，點知都有驚喜喎．首先係一個沙律，清清地都幾好食．跟住就係一個湯同一個焗蛋做前菜，個湯就唔知係咩湯，不過真係好唔錯，幾清幾好味，個前菜亦都幾好食．主菜係一條炸魚，行啲都要講返句”好好食”．最估唔到嘅係，除左條炸魚之外仲有一件牛排添，仲要係好好食嗰隻．不過當然冇神戶牛咁好食啦，但係碟牛真係幾重肉味，而佢地仲保留到好多肉汁添，真係有大師父嘅風範．食飽飽仲有雪糕做甜品添，真係意想不到．最令到我地開心嘅仲係包左間餐廳嘅感覺原來係咁好架．

食完甜品喺度踱節目嗰時，見到原來佢地都有酒店Pickup　Service，仲有熱氣球同埋有馬騎添．不過我地都唔係好鍾意騎馬，因為都知道會好臭．睇完王子變青蛙之後又真係唔敢亂坐熱氣球，真係唔驚死咩．我就提議想再去Ningru　Terrace，不過翻譯員話唔想去喎，佢話聽日好多地方要去，不如早啲訓聽日早啲起身咁話喎．就係咁我地就唯有早啲訓喇，唉！我嘅Baked Milk啊．

我的Picasa相薄


行程

湯之川渚渟溫泉酒店5：40　->　函館朝市　06：20/06：37　->　富良野朝日之Ataru家　12：37/13：20　->　富田農場　13：35/14：52　->　彩香之里　14：57　->　Ningru　Terrace　15：35/15：57　->　Pension　Furanui　16：10

2006仲夏北海道雲雨霧之大作戰-第五日

五月三十日...函館原來都係Shopping嘅地方　－　天氣（陰陰地又冇咩雨咁囉）

五稜郭公園有靚女

一早起身第一件要做嘅事就梗係浸一浸啦．浸完之後成個人精神哂，亦都好肚餓，跟住就梗係去食早餐啦．一落到去，就比個無敵海景給吸引住，唔洗問阿貴，就梗係霸返個海景位先啦．講返個早餐，一般美式嘅早餐加少少日式年糕，同溫泉蛋，最令我驚喜嘅就係個Yogurt，入面竟然有果肉添，真係好好食架．

食完早餐就向住我地第一個目的地〔五稜郭公園〕出發．由酒店去五稜郭公園全程都只係要四個字左右．離好遠你就會見到五稜郭塔，都唔會點行錯路．上塔係要比840Yen入場費，有啲貴．上到塔上面望返落嚟都好靚，塔上面又係有Souvenir賣啦，有關於五稜郭公園嘅歷史啦，有五稜郭公園嘅模型啦，仲有得睇相添，都只不過係300Yen咋，仲平過廟街，可惜我地聽唔明吖．不過上面最吸引人嘅都係地面嗰塊玻璃，望落去都幾驚架．落返嚟之後又係Souvenir時間．咦，明明個Topic話有靚女架，點解提都冇提過嘅？原因好簡單，睇完相你都仲問呢個問題咪即係你唔認同囉…

究竟係睇風景定係Shopping架？

跟住我地就用左九秒九嘅時間去睇風景喇，包括：-

八幡”土反”，遺愛幼稚園，東正教教堂，仲有兩間唔知叫咩名嘅教堂咁囉．

睇完風景有咩做？咪係去金森紅磚倉庫Shopping囉．

Shopping完就去左函館裏面我最開心嘅地方，就係函館朝市一間叫巴丼嘅食堂．佢有個叫四色丼嘅飯，簡直係人間極品．而且價錢仲係比二条市場個o-Toro丼平，只係要1880Yen，材料方面有海胆啦，蟹肉啦，帶子啦，仲有蝦添．可能因為所有嘅材料都係我鍾意食嘅，所以我直程想Encore添，不過佢嘅份量都唔少，所以我唯有放棄呢個咁誘人嘅想法喇．退而求其次，我地就叫左個牡丹蝦Sashimi，真係好大隻又好好食架…

食飽又再返去金森紅磚倉庫繼續Shopping，點解？因為都未行明治館…明治館嘅地下基本上係賣玻璃嘅．而樓上呢，竟然係有一間好大嘅精品店，仲要係主力賣龍貓系列添．唉，翻譯員其實已經有齊全個Collection，不過比佢再見到，佢都仲係話好想再買喎…而我地行完樓上之後，竟然仲花左好長嘅時間係樓下買玻璃擺設做Souvenir．今次我地又再喺金森紅磚倉庫消磨左兩個鐘頭咁多啊…

跟住我同翻譯員就喺決定下一站嘅目的地時，有以下嘅對話：

對話

冒險家：“跟住去邊好呢？”

翻譯員：“你話事喇．”

冒險家：“不如去大沼國家公園吖”

翻譯員：“…有咩睇架？”

冒險家：“都係啲天然嘅風景咁囉…”

翻譯員：“去嗰度要幾耐架？”

冒險家：“大概一個鐘咁上下啦．”

翻譯員：“嘩，咁遠架，唔好去喇．”

冒險家：“…咁而家有咩做啊，我地唔係話夜啲先上函館山架咩？”

翻譯員：“去丸丼今丼吖，東京嗰間太多香港人去，啲Common嘅Item成日都賣哂架．”

冒險家：“吓？函館有丸丼今丼咩？”

翻譯員：“梗係有啦，我喺網上面見過喇．”

冒險家：“…但係我地本書都冇介紹，又唔知電話，點去啊？”

翻譯員：“唔怕，入五十音咪得囉．”

冒險家：“…”

唔洗兩分鐘佢已經用五十音Set左個目的地去丸丼今丼，而今次係佢第一次咁快就可以用五十音Set個目的地嘅，簡直破哂佢自己嘅記錄．

就係咁，我地就去左丸丼今丼，而翻譯員仲真係買到佢喺東京買唔到嘅RMK　58號同11號嘅好似係眼影嘅嘢．而我喺冇哂佢辦法底下，唯有又搵地方坐底食嘢喇．不過都算我好彩，竟然比我搵到一間咖哩天婦羅蝦飯，仲要都幾好食吓架，原本惡劣嘅心情馬上好返起嚟．不過可能心情始終都唔係好OK，所以我又再唔記得影返張相就食左個飯，好彩今次門口有個Sample可以比我地補飛姐．

從函館山往下望就係人都話靚　–　我就話好…白囉

時間都只係四點半多啲，翻譯員就決定去函館山睇夜景．經過今朝嘅大沼公園事件之後，我就決定左唔再比意見，費事失望啦！早就雖然係早左一啲，不過上面都有一間餐廳可以比我地坐吓等天黑，都幾好吖．一路上我地都覺得唔係好對路，但係又講唔出係咩原因．只係十數分鐘嘅車程已經到左函館山個纜車站，翻譯員第一時間埋去Counter買飛，不過個Counter姐姐就舉高一個牌而唔賣飛比佢住，牌上面係咁樣寫”因為大霧關係，山頂景觀將會受阻．”，嘩，個姐姐真係叻，竟然唔洗問都知我地係要睇繁體字嘅人．見完個咁多繁體字嘅牌之後，我先知道我地覺得唔係好對路嘅原因，原來係因為我地望來望去都望唔到個函館山頂…喺咁嘅情況下，我地都覺得係要再唸清楚先，因為上山纜車飛係要1000Yen一個人，都唔係話少錢．喺下面十五/十六左一陣，當然係一邊睇Souvenir一邊十五/十六啦．大概行左十多分鐘左右，最後我地都係決定上山．一來今晚係最後一晚喺函館，二來我地都可以上去行吓商場睇吓嘢咁，再唔係咩，又可以喺餐廳飲吓嘢等啲霧走，而我就多一個Consideration，就係我明知而家唔去，翻譯員返到酒店實唔會再出嚟．

就係咁，我地就買左飛上山頂喇，上到架纜車已經有少少後悔．原因係，第一，架纜車比想像中細左少少，而且仲要係得一架上，一架落添，山頂上面地方都應該唔會太大．第二，架纜車原來係冇得坐架，我都知我的而且確係懶左少少．第三，架纜車好快就入左入去霧裏面，咁即係話啲霧都幾厚吓…冇計啦，都比左錢上去，唯有睇吓上面有幾多嘢行啦．一上到函館山頂就馬上知道[瀨嘢]…原來上面得一間賣Souvenir嘅舖頭，仲要唔係好大添，跟住就得兩間餐廳（有一間餐廳仲冇開門添…）同一間介紹函館山嘅劇院，入去劇院即係浪費時間，因為都聽唔明．唯有行吓嗰間賣Souvenir嘅舖頭啦，不過你估都估唔到喺呢間舖頭，賣得意公仔大鐘仲平過喺下面金森紅磚倉庫買添．原本我地都有啲心郁郁想買佢返香港，因為真係幾底，不過個鐘真係大左少少，所以我地嘅理智終於喺呢場戰爭之中勝出左，結果都係冇買到…原本都唸住入去間餐廳裏面坐喺度等啲霧散，不過見半個鐘之後啲霧仲好似濃左…最後都係決定唔喺度浪費光陰，馬上打道回府，返酒店食飯同勁浸溫泉喇…唉！而家我地先知原來香港太平山嗰個老襯亭真係好大，好多地方比遊客行同Shopping，而我仲覺得架纜車真係好底搭添．

返到酒店同前台講低左幾點食飯，之後又係浸溫泉嘅時候，浸到真係唔想走．落到去，佢地亦都好準時咁準備哂我地嘅晚餐．今晚嘅晚餐基本上係同尋晚一樣，都係咁多，不過啲款式就唔係好同吓，起碼冇蝸牛Sashimi先啦．食到最後一個主菜，燒銀雪魚，佢地竟然無跟沙律漿．我地唯有叫佢地比啲沙律漿我地啦，冇沙律漿嘅燒銀雪魚就點都好似少咁啲嘢．唉！但係合我兩二人之力，又Saladore Source，又Saladore，講到口都乾哂，佢地都係搵左啲唔知咩生果漿嚟比我地，為免遭天遣，我地決定放棄．點解會遭天遺？因為佢地已經拎左三種唔同嘅漿比我地喇，不過都係冇一種中，再係咁落去會好浪費食物，所以咪怕會遭天遺囉．就係咁，我地又好無聊咁浪費左一日喇．

我的Picasa相薄

行程

湯之川渚渟溫泉酒店　8：35　->　五稜郭公園　8：46/10：00　->　八幡”土反”/遺愛幼稚園/東正教教堂　10：13/10：30　->　金森紅磚倉庫　10：32/12：00　->　函館朝市　12：20/13：06　->　金森紅磚倉庫　13：10/15：00　->　丸丼今丼　15：15/16：10　->　函館山　16：45/17：35　->　湯之川渚渟溫泉酒店　17：59

2006仲夏北海道雲雨霧之大作戰-第四日

五月二十九日...函館大長征　－　天氣（又陰又落雨）

今日可能係比較攰嘅關係，訓到成九點鐘先起身，一早起身食完早餐就馬上去Checkout．出到街竟然發現冇落雨喎，唔洗問啊貴，梗係去賞吓花同埋睇吓風景咁啦．第一站就係時計台，到達時間係9：57，仲比我拍到標位添．嘩，真係天開眼．喺時計台從唔同嘅角度影吓相咁，竟然唔洗五分鐘就玩完，呢個時計台比到我地嘅感覺係唔嚟都冇損失，尖沙咀個大笨鐘會比較值得去囉．第二站就梗係喺正隔離嘅大通公園啦．大通公園都幾靚，不過我地行左唔夠四個Block就放棄嘞．我估翻譯員嚟北海道唔係真係相睇花囉，不過佢話喎：“點解度度啲花都係一樣嘅？”．就係咁，我地用左十分鐘嘅時間就將個大通公園行完喇，有一半時間仲要係等過馬路添．不過據我所知，我地行左一半都冇囉…而且喺後面仲有一個玫瑰花園添，真係唔底．

下一站又係Shopping，不過今次終於都到我喇，目的地係Tokyu Hands，目標係Porter…又比我成功R到一個Porter返工嘅袋．Yeah！Shop完ping就去左雪印Parlor本店食個雪糕．我就叫左一個推賞嘅雪印Royal　Special，而翻譯員就叫左一個抺茶雪糕．雪糕嚟到嗰時，高下立見．我叫嗰個Royal　Special，淨係睇已經贏哂，仲好鬼香添．翻譯員竟然食左佢嗰個抺茶雪糕兩啖就話唔食囉喎．唉！做人要有衣食架嗎，咁我咪唯有食埋佢囉，都唔好講笑，又真係唔係幾好食喎，唔夠滑囉．返到去架車嗰度已經係11：52分，咪標位只係夠停一個鐘姐，我地梗係過時啦，仲唸住啲人周圍拍都冇問題啦，過左半個鐘多啲姐，應該唔伯呱．點知離遠已經見到有一張野放左係車頭…咩話？唔係咁黑仔啊…睇真啲，原來只係話比我地聽，六月一日會有新法律，就係殺無赦…好彩姐…咁又比我過到骨．等我仲以為雨過天清，一天都光哂添．．．

行到餓餓地咪去二条市場近滕昇商店食番個魚生飯先啦．嘩！都唔係平喎，我叫嗰個o-Toro魚生飯都要成2000Yen，而翻譯員就叫左一個1500Yen嘅三文魚加魚子飯．初初見到阿姐嘅手勢都好似唔係好識咁，即刻有一種被騙嘅感覺．好彩食起上嚟都算幾好食，可能只要啲料夠靚就邊個做都會好食呱．食完個魚生飯之後就唸住去埋玫瑰園先起程去函館．大概半個鐘就到左玫瑰園一帶，附近啲屋都好鬼死靚吓，我唸都算係高尚住宅區．不過當我地去到玫瑰園門口，竟然發現個玫瑰園原來六月一日先開…點解啲書冇講嘅…

GPS新發現

唯有收拾心情，繼續上路啦．當翻譯員睇見GPS嘅時間顯示嘅時候幾乎叫左出嚟，因為根據GPS嘅估計，我地將要零晨時份先可以到達函館，一加一減下即係要十個鐘嘅車程先可以到達函館？係真唔係啊，明明喺網上面已經睇過只係要五個鐘咋喎，點解GPS話要十個鐘呢，唔通個Website好似本書咁唔夠Update？我地開始覺得個天唔會對我地咁好架喇，冇啦啦無雨比我地周圍去咁好？

就算係幾多個鐘我地都係要去架啦，唯有懷住沉重嘅心情上路啦．不過你都咪話唔驚，一來十個鐘唔係話講得少架嗎，二來我地酒店包左嘅晚餐咪冇著落…唸起都驚…唯有楂快少少咁多啦，鬼叫佢嘅Speed　Limit係80km咩．條路又長又直又闊，點睇行100甚至120都應該冇問題啦．不過天氣真係好差，又唔知點解，去函館嘅車又真係好少，雖則話有GPS，應該唔會行錯路，不過比你楂成個鐘都見唔到一架車，天氣又好差，天色又好陰，仲要人生路不熟添喎，你都咪話唔驚．

行吓行吓，突然之間聽到架車嘅左前轆有啲震同埋有啲中頻率嘅聲音…喂，唔好玩野喎，啱啱開始就壞車？真係有啲驚．又比我見到有條勁長嘅避車處喎，第一時間喺避車處停低架車，跟住落車睇吓有咩問題．其實我只係可以睇吓有冇表面傷痕咋，不過睇嚟睇去都唔見有咩問題．睇左一陣都冇發現，咪又上返架車，再開一吓，睇吓停左一陣之後會唔會好啲囉．點知仲怪，而家連右邊都有畤有聲添，仲係左右輪流咁有聲添．都係唔係好放心，所以就冇繼續開，而係喺避車處嗰度後車，唸著再試一次，清楚啲好嘅．今次牛咁眼咁望住個左前轆，竟然比我發現左係咩事．原來係地上面用嚟提醒啲司機，話比司機聽而家已經偏離左路中心，而且開始上到路肩嘅特別坑紋…雖然知道係自己做錯事，不過點都都好過架車真係有問題吖！安心再上路，為左要追番頭先浪費左嘅時間，我又再開快左小小喇．

當行完道央自動車道嘅時候，已經係五點半咁上下．忽然間翻譯員好似有重大發現咁，原來佢見到GPS個估計到達時間竟然變成八點幾九點…咩話？原來個時間係唔準架，都冇咁驚．出左道央自動車道之後，竟然比我地跟住架警車用一個好好嘅速度咁行左一半嘅路程．再睇吓個GPS嘅時間，一睇之下，發現而家只要再楂多一個鐘就可以到達湯之川溫泉喇．當知道呢個事實之後，個人馬上輕鬆翻哂，仲叫翻譯員打電話問吓酒店幾點有飯開添．同酒店個Staff傾左一陣就知道原本係有個Range嘅時間可以食飯，不過我地都要同佢地Book左個時間先，可能飯枱唔係好多呱．同佢地Confirm左個一鐘之後開飯，開車嘅速度就不知不覺間又快左少少，唔洗講都知係肚餓喇．

湯之川渚渟溫泉酒店　－　好正啊

七點都未到就去到湯之川渚渟溫泉酒店喇，佢地個後生仔Reception啲英文都唔錯，不過就好多時要停一停，唸一唸先講到，不過溝通得到我地已經好開心架喇．再同佢Confirm個食飯時間之後就上返房間喇，唔洗問阿貴，上到房就梗係第一時間浸番個溫泉先啦，唔好浪費左個私人露天風呂吖嗎．唔知係唔係浸完溫泉會好肚餓嘅呢，我地直程餓到手軟腳軟添．準時落到餐廳，食物已經準備好．成個Set好多餸吓，有前菜六小碟，北海道特產長腳蟹食（不過我都係覺得Kani將軍好食好多），仲有魚生啊，蝸牛Sashimi啊，真係好嚇人架，翻譯員發現嗰陣已經有半個蝸牛頭喺佢口入面，你話驚唔驚，好彩我一食就覺得唔好食，所以完全冇食到．除左呢個咁嚇人嘅蝸牛Sashimi之外，都仲有蝦啦，帶子啦，墨魚啦，仲有啲唔之係咩嘅紅色魚生添，都幾好食架．除左呢啲仲有蒸水蛋啦，又有三文魚啦，仲有湯啦，最後仲有個清湯添．仲未完架，你仲可以揀一個飯，當然唔少得嘅就係甜品啦．唔夠飽？你仲可以免費任食出面嘅Buffet添架．

食飽飽就梗係唔好浪費，再浸一次啦．浸完之後成個人醒哂，不過都係早啲訓，聽日早啲出動．於是就打個電話去Front　Desk叫佢地啲同事嚟幫我地舖牀．因為頭先個Reception講過比我地聽，話如果我地想訓，就可以Call佢地上嚟幫手舖TaTaMi．基於懶得就懶嘅原因，我地就梗係冇洩底，Call佢地上嚟搞掂佢啦．佢地嘅反應亦係一等一咁快，唔洗二分鐘，佢地嘅舖牀專家就撳我地個門鐘，但係佢地個效率真係快左少少，佢地竟然係三秒鐘內就唔等我地幫手，自己就咁開左門？好彩我地都係有著衫姐，如果唔係咪洩底哂…佢地梗係以為冇人喺入面，所以佢地入到嚟，見到我地都坐左喺度，都立即係咁同我地Say Sorry．然後我地就坐左喺度睇表演．嚟幫我地舖牀嘅就係兩個特技員，佢地嘅合拍程度直程係冇嘢好講，而佢地嘅熟練程度簡直令我地有睇Show嘅感覺，唔洗二分鐘，佢地就可以完成呢個咁偉大嘅工程．

我的Picasa相薄

行程

札幌京王酒店　9：40　->　札幌畤計台　9：57/10：00　->　大通公園　10：13/10：27　->　丸丼今丼　10：40/11：00　->　雪印Parlor本店　11：16/11：40　->　札幌畤計台　11：52　->　二条市場　12：35/13：30　->　玫瑰園　13：50　->　湯之川渚渟溫泉酒店　19：00

2006仲夏北海道雲雨霧之大作戰-第三日

五月二十八日...札幌Shopping　－　天氣（傾盆大雨）

白之戀人館有驚喜

“晨早起牀，傾盆大雨，嗰個太陽，唔知去左邊…”（冇睇過TownGas廣告嘅你，仲唔快啲搵番嚟睇）

因為連日嚟都冇覺好訓，所以今日我地都訓到好晏，大概十點先去攞車，唔洗二十分鐘，就去到白之戀人館，包括行錯路嘅時間．其實喺尋日去小樽嗰時已經試過行錯一次架喇，點知今日都係要行錯一次先安樂，唉！可能都未係好習慣點樣同個GPS配合啦．Anyway，到達時間係10：30分左右．其實白之戀人館都幾方便楂車嘅人去，因為只要買滿2000Yen佢地就提供冇料Parking，真係好．起初我地仲以為一來落大雨，二來又仲係早，所以應該會冇咩人．點知當我地架車行到附近已經見到好多旅遊巴，同遊客喇…

一入到白之戀人館，我地第一樣見到嘅竟然係…好多人像？真係唔知係咩邏輯，我地睇來睇去都唔明呢啲人像同白之戀人館有啲咩關係．不過再奇啲嘅事陸續有嚟…

白之戀人館嘅地下係有Buffet食啦，有人像可以比遊客同佢地影吓相啦，有隻假嘅大馬車啦，有一缸天使魚啦，有宅急便啦，當然仲有得賣白之戀人朱古力啦，不過我覺得最奇嘅仲係竟然有酒同雪糕賣添．

出面仲有一個都幾大嘅花園，花園裏面有好多建築物比遊客影吓相咁．通過個花園，你可以去到Museum嘅入口．咁樣講得就梗係要比入場費啦…

比左每人600Yen入場費之後，你就可以上去參觀架喇．第一層都係一啲歷史啊，以前用嘅Packing同餐具啊咁囉．最特別嘅係有立體影像睇．

二樓就可以比遊客遠眺生產線啊，又有立體影院啊咁，不過唔好問我立體影院講啲咩囉，因為佢識我，我真係一啲都唔識佢．

三樓就多采多姿囉，有好多糖造嘅手工藝品．啲手工藝品真係好別致架，就算同款嘅，個個都有少少唔同添架，仲有好多唔同嘅款式添，又有人即場示範手工藝品嘅製作．有興趣嘅仲可以比少少錢自己落手落腳去學造添．啲糖造手工藝品靚到翻譯員差啲唔肯空手就咁走添啊…最後仲有少少好靚嘅餐具啊咁．行到攰攰地仲有一啲比較高級啲嘅Tea食．

經過餐廳就係一條向下走嘅樓梯，咁就梗係散Band走架啦，當我地以為冇其他嘢睇嘅時候，驚喜就出現喇．首先出現喺我地面前嘅係一個1比1小飛俠人像，小飛俠係陪住我長大嘅卡通角色之中我最鍾意嘅一個．當然我係唔會放過呢個咁好嘅機會同佢影番一張合照啦．之後就見到一個叫做真實之口嘅唔知咩…的而且確唔係咩咁特別．但係之後就有好多好多嘅公仔，放滿一個又一個嘅玻璃櫃裏面，大大話話都有成十幾個咁嘅公仔櫃．仲有我最鍾意嘅小飛俠構造圖添！嘩，今次真係冇死喇．講你都唔信啊，就係咁，我地就用左一個鐘頭喺白之戀人館又影相啊，然後又再影相啊咁，最後先用左小小時間嚟買Souvenir咋．走嘅時候大概係11：40左右．

啤酒博物館　－　博物館唔應該係咁

跟住就去左期待已久嘅蛯天天婦羅，佢地連氣水杯都係岩岩喺雪櫃拎出嚟，等啲氣水可以Keep住凍，唸得真係周到．而個天婦羅就梗係好好食啦，價錢方面都叫做合理，大概1100Yen一個咁嘅Set．食飽之後就楂車去啤酒博物館睇下嘢咁啦，點知個所謂嘅啤酒博物館都冇人行嘅．冇人行就梗係有原因啦，一來就真係細左啲，二來就真係冇咩歷史價值，因為入面唔係好多歷史嘢講．唉…最大鑊嘅仲係原來後面就係…Sapporo　Factory…又係Shopping嘅時間…好彩我都唔執輸，成功喺ABC　Mark　R到一對Nike波鞋…Yeah！

Shop吓Shop吓，又Shop左個幾鐘喇…Shop到攰嗰陣，翻譯員嘅腳痛病又發作喇…又話唔得囉喎，一定要馬上，馬上即係立即，立即即係即刻要坐低…本來想食Donut不過冇位要等…咁即係冇行，其他馬上有位嘅就一係中菜（死都唔食架喇），一係拉麵（唔似好食囉），一係意大利嘅迷你生果Pizza（唔敢試），仲有嘅就係印度咖哩同薄餅（食呢啲嘢就梗係去印度先食啦），同埋StarBucks（食晏會唔會唔係咁啱呢），最後嘅就係翻譯員發開口夢都話想食嘅KFC（不過我真係覺得將啲雞炸到乾哂水，淨係有啲香料味，有啲咩咁好食呢？）報應啦…啲雞難食到爆啊…又乾水，又”鞋”，成舊擦子膠咁…難為我要同佢一齊受啊…唉！不過今次真係比上次喺東京更加難食，仲難食過香港食嗰啲添，應該係我食個嘅KFC之中最難食嘅．

食完就梗係再Shop吓咁啦，竟然比我地見到另外一間Nike專門店，我見翻譯員三日唔埋就兩日嚟一次料，咁落去真係唔係辦法，見到有AirMax360賣就叫佢試吓啦，點知佢試完之後就鍾意到不得不得了．我當然係咁叫佢買啦，不過一對成萬九Yen喎，但係女人嘅理智就梗係好容易喪失架啦．不過竟然身為冒險家嘅我，一試之下都唔捨得除落嚟，原來真係好舒服架，仲好彈添…最後竟然比我又再成功R到添．Yeah　Yeah！其實Sapporo　Factory都有啲嘢可以Shop吓嘅，例如eRoyce朱古力啦，ABC　Mark啦，又有女士門最鍾意嘅日本雜誌舖頭啦，就係咁，我地就喺Sapporo　Factory玩到六點鐘先走．

炭炭

喺車上面就聽到翻譯員喺度索鼻，原來佢感冒，唔怪得頭先咁燥啦．真係好似揍BB咁要用估嘅…好彩下一站就係一定要今日去嘅藥房…點解一定要今日去？身為女仕門嘅你地就梗係知道點解啦…原來每逢星期六日所有藥房都有Discount架！！冇辦法啦，鬼叫個天都幫哂佢，係咁落雨咩…唔Shopping真係冇嘢做…

又用左半個鐘頭去藥房度Shopping…（藥房有咩Shop？唉…你地知唔知SaSa其實都係一間藥房嚟架…咁你而家知藥房有咩Shop啦，我就試過一日裏面，每次經過一間藥房都要等最少一個鐘嘅記錄喇，當然係一日內去過好多間我先咁講啦．幾多間？…冇五間都有四間，仲要有啲要Revisit添．）好彩，佢今次冇咁過份，只係Shop左一個鐘多啲．之後我就梗係買左感冒藥，監佢食啦，費事我成個Trip都難受啦．

之後又係醫肚嘅時候喇，今次嘅目啲地係一間叫炭炭嘅自助燒烤店．起初都有啲驚，梗係驚自己嘅手勢差，浪費左啲嘢食不特止，仲要幾難食都要食添架…最慘嘅仲係冇得發洩吖嗎，正所謂自作業不可活…就係因為咁嘅原因，翻譯員點都唔肯出手，梗係怕我唱衰佢啦…就係喺咁嘅情況底下，我呢個冒險家就駛出我嘅看家本領喇，其實我有一個鮮為人知嘅綽號，就係味吉陽七喇．

第一個要對付嘅目標就係一碟頂級和牛．壓力真係好大架，因為嗰碟和牛真係好鬼死貴，成880Yen都係得嗰6件．真係講你都唔信，估唔到我嘅手勢一啲都冇生疏到，喺我嘅精心炮製吓，呢碟頂級和牛竟然變成神戶牛柳一樣咁好食，我地仲Encore左添．明眼人一定知道，呢兩碟咁細碟嘅和牛，就算點好食都冇可能完全醫好我地兩個大胃王嘅肚，所以我地就另外再叫左一隻帶子，同埋一碟日本唔知咩縣出産嘅豚肉喇，一路都好順利，不過最敗筆嘅就係我地兩個都唔係好敢食比較生嘅豚肉．話哂都係一隻豬嚟吖嗎，就係咁樣，我地最後只係可以食到同呢間舖頭同名嘅一舊炭喇…　真係失敗．其實都唔係好飽，不過尋日喺Kani將軍已經將我地嘅Budget洗哂，所以就算唔係好飽都冇錢再叫其他嘢食．

JR Tower

喺走嘅時候再去七仔買左一杯香港冇得賣嘅Häagen-Dazs黑芝麻雪糕（不過而家有得賣喇），真係好好食…時間大概係七點半左右，喺咁嘅時候，咁嘅天氣（成日未停過雨），仲有咩可以做吖，咪又係Shopping囉，去邊？咪又係丸丼今丼囉，我就當然冇佢咁好氣，咪好似尋日一樣喺架車上面回吓氣等佢啦．原本我想楂架車周圍去，不過翻譯員驚死我唔返嚟咁，點都要我喺架車度等佢，話好快就行完咁話喎．你估都估唔到竟然喺同一間舖頭Shop左幾日，都係可以Shop左成個鐘．女人呢樣嘢就真係唔係一般人可以理解佢地唸啲咩…初頭唸住Shop埋今日佢都要等到返東京先有得Shopping架啦，咪就吓佢囉，唉！原來…唔好再提喇，睇落去你就知架喇．

到最後我地都係決定左去T38唔去澡岩山瞭望台喇，原因好簡單，就係得T38係喺室內睇風景嘅，喺呢啲落住雨嘅天氣就真係連揀都冇得揀…喺T38睇風景都予左唔會好靚架喇，其一係因為佢係室內，點都係隔左一層玻璃，二來落住咁大雨，點會清楚吖．好彩一早有哂心理準備，一啲都冇失望．

我的Picasa相薄

行程

札幌京王酒店10：10　->　白之戀人館10：39/11：50　->　蛯天12：40/13：30　->　啤酒博物館+Sapporo　Factory13：50/18：08　->　藥房18：10/18：24　->　炭炭18：58/19：34　->　丸丼今丼　19：40/20：20　->　T38　20：40/21：20　->　札幌京王酒店　21：44

2006仲夏北海道雲雨霧之大作戰-第二日

五月二十七日...小樽Shopping - 天氣（好難得晴朗喎）

攞車　–　執左笠咁大鑊？真係風回路轉．

今朝約左９：００攞車，所以我地就喺８：００就起身落去食酒店包嘅早餐．食物方面係美式加日式，即係炒蛋，腸仔，飯，納豆，味噌湯，生果，嗰啲嘢囉．可能我地嘅食物鏈比較窄嘅關係，我同翻譯員都唔係話食得好開心．

好快咁食完早餐之後就以九秒九嘅速度跑去JR西口攞車，誰不知搵來搵去都搵唔到Toyota　Rent　a　Car嘅Counter，於是乎就去問吓JR站Visitor　Service　Counter個姐姐，嗰個Toyota嘅Counter係邊？佢應該係聽唔明我想去邊，因為我係講英文，不過佢大概知我係要去Toyota　Rent　a　Car嘅Shop．佢自己喺張地圖度搵左一輪，就係上面搵左Toyota　Rent　a　Car嘅札幌店比我地睇．一睇之下仲大鑊，發現原來係喺京王酒店對面…

就係咁，我就比翻譯員喺一路行返轉頭嗰時，就一路噴左一面屁喇，又話咩早就叫你Check清楚先架啦，又話咩一早喺網上面睇到喺酒店對面架啦…（咁你又跟我行？當然冇出聲啦，費事．）經歷左大概五分鐘極之冇癮嘅步行之後，出現喺我地面前嘅竟然係．．．〔一個地盤〕？唔係吖嗎，咁都得？翻譯員唯有喺極唔願意嘅情況之下，走左去用日文問一個喺地盤開梗工嘅工人知唔知喺邊喇．點知我地竟然喺嗰個地盤工人口中，知道左一個令到我同翻譯員都好唔開心，亦好唔想聽到嘅答案．原來間舖頭搬左去京王酒店？早知出嚟之前問吓酒店啲Staff，咁就唔洗咁慘啦…

玩吓玩吓，都玩到9：40先攞到架車，真係洩底哂…仲喺度唸唔知有冇得Refund番嗰40分鐘嘅錢添？我同個姐姐喺一路行去攞車嗰時，同佢講一陣會由翻譯員同佢學用個GPS，因為阿翻譯員識小小日文．到真係學用GPS嗰陣，我就梗係推翻譯員出嚟學啦，而我就坐喺後面聽．當我地講極佢都唔明嘅時候，翻譯員終於都決定用佢好有限嘅日文，問返嗰個問題，佢突然之間好似訓醒左咁叫左一聲”Nehongor？”即係日本語咁解．喂！我喺行梗過嚟嗰陣咪同你講左囉，大姐…翻譯員為免佢係咁講日文而自己聽唔明，佢就答佢"Scorshi"，即係話少少咁解．

喺佢知道翻譯員原來係識小小日文之後，成個節奏就馬上快左好多，佢以一半日文加上一半英文咁講解個GPS嘅用途．喺最短嘅時間裏面學左點樣用電話或者五十音去Set個目啲地，同埋學左點樣揀用收費道路知後．我地就自己玩左個GPS一輪，點知隔離個哥哥見到我地好似有啲唔係好識用咁，佢馬上過嚟睇吓有咩幫到手喎，呢啲服務態度先係波架嗎．

出發去小樽Shopping喇

我地用英文話比佢聽冇問題，然後再玩左一陣，之後就馬上Set左個目啲地去小樽浪漫館，然後就全速前進．只係用左半個鐘嘅時間，我地就到左小樽，再行多一個字左右就到左我地第一個目的地：小樽浪漫堂．到達目啲地時間係10：40分．嗰度真係好靚，但係啲音樂盒就真係貴左啲．原先答應左翻譯員任佢揀一個自選歌曲音樂盒，不過翻譯員唔知係唔係都覺得貴，所以到最後佢都係放棄左．喺小樽浪漫堂行左差唔多一個鐘

影左好多相，又買左小小Souvenir之後，就過對面細啲嗰間夢之音．感覺係好……細囉．唔洗十分鐘就行完夢之音．我地對夢之音嘅感覺除左細之外，仲有一個感覺，就係怪．唔知點解，佢除左賣少少音樂盒之外，其他大部份嘅竟然係公仔，而且款式仲多過音樂盒添，有Snoopy啦，Miffy啦，Micky啦，宮崎駿系列咁啦，仲有好多其他唔同嘅卡通片主角添．

行完呢兩間舖頭之後就有另外兩個發現．第一個發現，就係原來呢兩間舖頭出面係有幾個好大嘅花生米（Snoopy）公仔．翻譯員梗係唔會放過呢個咁好嘅機會同佢地影番幾張相啦．過左十分鐘左右我地就聽到第二個發現，你冇睇錯，真係聽到而唔係睇到，因為係啲聲音首先吸引左我地，然後先睇到架．原來喺馬路附近有幾個大煙囪同埋音樂盒，每隔一段時間（我估係每逢踏半同踏正），嗰啲煙囪同音樂盒都會用好好聽嘅音樂嚟報時比路經嘅途人聽同睇．冇錯係真係有得睇架，不過因為真係有啲突然所以我地都把握唔到時間將呢個咁嘅情景影低同你到分享一吓．

聽完又睇完咁動聽同咁得意嘅報時之後，我地就馬上楂架車去食正壽司喇．唔洗十分鐘就到左正壽司，行到過去正壽司個門口嗰陣，真係有啲驚，因為個門口真係好Grand，好似一啲好貴好貴嘅地方咁．雖然真係有啲貴，不過我地都係覺得係值得嘅．我地叫左兩個Set，一個係3800Yen嘅特上政壽司，另一個係2800Yen叫Tachibana嘅Set，中文真係唔知叫咩，不過勝在有相睇，同特上政壽司差唔多，主要係少左個o-toro同botanebi，即係大吞拿魚腩同牡丹蝦．我地學人地坐吧檯，可以睇住啲大師傅喺你面前準備你Order嘅食物，真係好有Feel架．一般嚟講，佢地都會主動咁同你傾吓偈，不過可能佢知道我地唔係日本人，所以就冇同我地傾．當佢地將啲準備好嘅食物攞比翻譯員嗰陣，因為張吧檯唔係好大，又已經放滿左餐具，翻譯員有啲唔知點算好．正當我想提佢嗰陣，大師傅已經好有禮貌咁教佢，其實係要將啲壽司放喺吧檯前面嗰一級度．啲壽司真係好好食，最差嘅就係嗰啲由黃色一粒粒組成嘅唔知係咩魚嘅魚春，因為有啲腥腥地，翻譯員仲差啲嘔添，之後就冇哂喟口喇．不過一向好怕喺香港食嘅魚子壽司，就一啲問題都冇，完全冇腥味不特止，仲好好食添，真係估佢唔到．

小樽水族館

醫完個肚之後，決定楂架車去小樽水族館，睇吓魚咁囉．因為呢啲地方一般都比較早收皮．用左大概二十分鐘嘅時間就去到小樽水族館喇，到達時間大概係１：２０左右．呢個水族館真係好易認，因為離好遠你都已經可以見到水族館出面嗰個遊樂場，最易認都係嗰個唔算好細嘅摩天輪．其實個遊樂場除左啲只係啱小朋友玩嘅小兒科遊戲之外，都有一個幾啱大人玩嘅人力遊戲架．你冇睇錯，佢絶對係一個人力遊戲…佢就係一個半空單軌人力單車，佢雖然離地面唔係好高，不過嗰度都好鬼死大風吓，見到架車郁吓郁吓咁，唔知係唔係比啲風吹到咁架呢，你都咪話唔驚．

水族館嘅入場費要1300Yen一個人，都成百蚊港紙，一啲都唔平．個水族館最吸引我嘅分別係門口嗰三隻海龜，同埋入面嗰一老一幼嘅蜥蝪，不過佢地好似食到好飽咁，郁都唔郁吓，可能係因為困住佢地個缸，真係太細喇．而另一方面，最運吉嘅就係食人魚囉，係人都知食人魚係好大食，所以缸水係濁到咩都睇唔到囉，你話係唔係運吉吖？連有無魚都唔知，唯一可以証實有無魚嘅方法就係放自己隻手落去…你話係唔好運吉呢？

其實自從去完沖繩，大阪同埋池袋嗰幾個水族館之後，我地對其他日本嘅水族館都冇咩期望，一來係佢地喺魚嘅種類分別都不太大．二來我地都覺得香港嗰個海洋公園比起上來一啲都唔差．雖然魚嘅種類唔係咁多，不過起碼除左睇魚之外，都仲有一啲幾激嘅機動遊戲玩吖，點睇都好玩過呢個咁幼稚嘅遊樂場吖．仲有個望著海嘅海洋劇場添，Size亦都大過呢個海洋劇場，而且仲有得坐添．都係唔好賣花贊花香喇，去過你自己感覺吓，就知我有冇講大話架喇．不過翻譯員似乎唔係好認同喎，佢到而家都仲係好掛住沖繩個水族館．又真係幾大又幾多魚嘅，不過都係我衰，冇Charge夠電，所以影唔到相，如果唔係都可以分享吓比你地睇，睇吓啲鯨鯊其實係有幾震撼．

小樽繼續Shopping

喺個咁細嘅水族館玩左半個鐘已經玩到冇咩嘢玩嘞，跟住就楂架車用左三個字左右，去最多舖頭嗰條街，Shopping去也．大部份嘅舖頭都係比較細，而佢地賣嘅玻璃小飾物，大至上都係一樣，連價錢都係一樣．行吓行吓，比我地見到有100Yen一小片嘅夕張蜜瓜賣，我同翻譯員都流哂口水，所以就決定買一片嚟止吓渴先，甜就真係好甜，不過有啲甜得滯，唔知賣300Yen嗰啲會唔會好食啲呢？不過我都唔係話佢唔好食，我返到香港食好多蜜瓜都係一啲都唔甜，所以你話要食甜嘅蜜瓜係幾難呢．而且亦可能係我地真係好期待有得食頂頂大名嘅夕張蜜瓜太耐，所以嗰片蜜瓜喺我地比完錢嗰一刻同一時間馬上消失左．．．．．所以冇相睇．

食完個咁甜嘅蜜瓜就入左去北一肖子館，呢間就比較大一啲，不過同浪漫堂比都仲係細左小小，不過佢嘅通道就比較闊，好行啲，同埋佢賣嘅嘢係著重玻璃擺設，例如玻璃碗筷，香薰燈，燈罩咁．行到有啲攰攰地，就去左雪印食雪糕，順便坐吓咁．蜜瓜味嘅雪糕都幾好食，不過個抺茶雪糕就麻麻地喇．個雪糕嘅質地都唔錯，好滑，可能係因為我不嬲都唔係好鍾意食抺茶味呱，不過你係唔會估到連雪印都有好多玻璃小飾物賣，而我地竟然都買左唔少添．

小樽運河

之後就梗係去小樽必到景點　–　小樽運河啦．翻譯員就叫我楂車去，不過我就想行去，因為我覺得小樽其實唔係好大，用行嘅可以順便睇吓其他舖頭同風景吖嗎．可能翻譯員隻腳真係特別構造．如果係行街買衫褲鞋襪化妝品咁，佢可以不停咁行三四個鐘都面不改容．而家行三四個字去小樽運河就又話口渴，又話好攰．到最後行左大概兩個字多啲嗰時仲話腳痛添，仲發哂老脾咁話點都唔會再行喎，又話我老點佢咁話喎，又話我話轉個灣就到都唔係咁話喎．吓？係真唔係啊？明明仲有一半都唔夠就到，都要返轉頭？係，我可能講得好似近左一啲，有少少老點．但係我真係睇過啲旅遊書話小樽真係好細，可以用行嘅去欣賞咁話架嗎．同埋我覺得去旅行係應該多行多睇，咁先可以欣賞多啲唔同嘅景色架嗎．但係知道同佢講咩道理都係假，因為佢而家根本就聽啲咩道理都聽唔入耳，真係冇哂佢辦法！唯有好似就小朋友咁就吓佢，行返轉頭攞車囉，唉．

架車經過我地頭先返轉頭嗰度再過多二三個路口就到小樽運河，翻譯員仲話喎”嗱，都話仲有好遠架啦”．我其實唔想旅行搞到大家都唔開心，所以就冇駁返佢轉頭，如果唔係就真係浪費左我頭先就佢嘅心血．喺運河附近兜左兩個圈，見到有兩個Parking，不過好似係人地公司嗰啲Parking咁，所以唔敢亂嚟，最後決定就咁學人地拍喺街邊就算．都唔知係咩邏輯，唔通拍街安全過拍停車場？其實有超過五十個巴仙嘅原因，係因為拍車嘅地方有一檔燒蟹腳！

一落車第一件事並唔係立即買燒蟹腳食，而係入去舖頭裏面方個靚便先．方完便之後亦唔係立即買燒蟹腳食，而係少行一吓呢一間賣Souvenir嘅舖頭．呢間舖頭其實冇咩特別，唯一特別嘅就係佢裏面有一間壽司食堂，不過我地都唔係咁肚餓，所以就無幫襯到．出到嚟，時間都只係四點半左右，想話埋去幫襯嗰間燒蟹腳啦，點知佢做左一個交叉嘅手勢出嚟．吓？大佬!唔係啊？四點半咋喎？翻譯員仲好唔甘心咁用佢好少用嘅日文Confirm個哥哥仔一次添，結果當然都係一樣啦…唉，唯有嘆自己一句　-　冇食神啦．

繼續行去運河方向，路經一間教堂．啱啱好有一對新人結婚，真係有啲好幸福嘅感覺，而我地就梗係唔會錯過呢啲咁好嘅機會同佢地影番張相啦．唔知係唔係涷嘅關係呢，呢個新娘子同尋晚喺京王酒店架電梯嗰度碰到嗰個都有一個共通點，就係佢地都係比較[大隻]．唔係我口衰啊，係真架，不過基於私隠嘅問題，我就不便張人地嗰啲相Post出嚟啦，不過我真係冇講大話架．

喺行過去運河拍攝景點其間，留意到經過嘅原來都係一啲被人棄置左嘅貨倉．喺行到運河個轉彎位嗰陣，竟然比我見到，原來運河係有提供冇料Parking，冇料即係唔洗錢咁解，唉，老洩添！終於都行到條運河拍攝景點，好彩我地不嬲都對佢冇咩期望姐，可能係因為聽得太多人講條運河嘅壞話喇．不過真係估唔到條運河景點原來真係咁…窄嘅，但係都真係幾靚．好快咁影左幾張相之後就上番我地架戰車返去札幌第二個大作戰嘅地點：Kani將軍去也．

決戰Kani將軍

Kani將軍係我地呢個Trip裏面其中一個風雨不改嘅行程．喺未出發之前，已經喺網上面Print左啲Coupon出嚟．因為比較多車嘅關係，我地用左一個鐘先可以由小樽運河返去札幌Kani將軍．去到Kani將軍兜左兩個圈都兜唔到入佢地個Free　Parking，唯有拍喺佢後面300Yen一個鐘嘅停車場．坐低之後覺得好肚餓，仲唸住一生點都要豪一次，萬五Yen就萬五Yen啦，所以咪叫左兩個Set囉．點知佢個Set係有九個菜架，仲要有啲係好飽肚吓架添．

當嚟左七個菜之後，翻譯員已經冇哂戰鬥力．而身為冒險家嘅我，唯有獨力迎接第八個考驗（道菜），正當我以為已經成功征服左Kani將軍而開始沾沾自喜之際，個Waitress姐姐竟然將殺傷力驚人嘅蟹腳壽司端出嚟，仲要係每人有五件咁多添．不過佢都好醒，我地都未開聲佢已經問我地要唔要外賣，我地就梗係馬上話要啦．佢可能係見到我地兩個都坐到好衰，個人仲已經好似冇哂氣嘅公仔咁添．不過身為冒險家嘅我，點可以咁丟臉不戰而降呢．於是乎我就拼死繼續作戰…　

對話

翻譯員：“你好叻咩，咪食得兩件咁大把！講到天花龍鳳咁．”

冒險家：“咩啊？起碼我返到酒店都仲可以將所有蟹腳都食哂吖！”

臨走嘅時候仲比我地聽到今次Trip裏面好少聽到嘅廣東話添，原來係一家有錢人，點解我一睇就知人地有錢？喟，一家四口去北海道喎？要洗幾錢啊？唔係有錢人係咩啊？跟住我地連原先話要去嘅T38啊，札幌電視塔啊，同埋嗰個藻岩山瞭望台啊，都冇去到．因為我地基本上連企直個身都有啲困難，而且個天仲開始落雨添．就係咁我地嗰晚就帶著個大肚腩先去小Shopping一吓．Shopping喎？梗係幾飽都冇問題架啦…去邊度Shop？梗係丸丼今丼啦，我去唔去？仲洗問？我梗係喺架車上面小睡片刻啦，順便回吓氣吖嗎．然後先至返酒店訓覺．到第二日先知，原來呢個Kani將軍作戰嘅失敗，牽連之廣，竟然係超出我地嘅想像…

返到酒店停車場門口，雖然我地喺嚟之前已經Check左京王酒店係會提供住客冇料Parking．不過穏陣起見，我都係叫左翻譯員去Reception度Check清楚，而我就停架車喺停車場門口等消息．點知得出嚟嘅答案係1000Yen任拍．雖然係同網上面寫嘅有出入，不過基於語言唔係好通嘅原因，而且價錢都算OK，所以我同翻譯員都唯有接受呢個Offer．再講，翻譯員亦都冇用任何方法去Double　Confirm過，我就覺得好可能係佢睇錯姐．

嗰晚喺酒店停車場，仲比我親眼見識到咩先叫做大男人．唔該喺香港睇梗呢編遊記嘅女士門清醒啲，睇清睇楚你地係有幾幸福先好再呻你男朋友點點點喇．件事其實係咁發生嘅，我地入到停車場架電梯，見到一對日本Couple，個男嘅兩手Fing　Fing咁行入嚟，而後面個日本婆，就好辛苦咁自己搬梗一箱好大嘅行李（一般嘅大行李夾）上大概十級樓梯咁囉，因為由停車場去電梯係一定要行一條樓梯嘅．我無拎過嗰箱行李，所以就唔知有幾重，不過睇個日本婆個辛苦樣，我估都唔會輕得去邊．你話做日本男人幾幸福？

我的Picasa相薄

行程

札幌京王酒店10：10　->　小樽浪漫館　10：40/11：50　->　正壽司12：22/12：59　->　小樽水族館　13：22/14：04　->　小樽雪印14：33/16：20　->　小樽運河　16：28/16：50　->　札幌Kani將軍18：00/19：20　->　丸丼今丼　19：40/22：40　->　札幌京王酒店　23：00

2006仲夏北海道雲雨霧之大作戰-第一日

五月二十六日...終於出發啦　－　天氣（陰陰地又有啲太陽咁）

出發啦

其實咩天氣都唔緊要，因為今日唔係搭飛機就係搭車，一大早六點半已經要帶住一個既病且累嘅身軀出門搭的士去機場．飛機仲早左小小到成田空港添，不過好多人入境，要用左一個鐘頭先可以過到個海關．一攞完行李，翻譯員就一枝箭咁衝左去排隊買Shuttle飛去羽田空港，當時嘅時間係3：45分．好可惜，最近嗰班車就真係唔會遲唔會早咁喺同一時間開出 ，即係3：45開出，唉！下一班車就係4：25　開，其實我地都有啲心急，因為我地係要搭6：10分開個班飛機飛去札幌，而Shuttle去羽田空港又大概要一個鍾頭，又唔知星期五會唔會塞車，去到仲要過Security　Check，又唔知要行幾遠，又想有時間食少少野，所以時間其實唔係有好多．不過冇計啦，唯有買4：25嗰班啦，
唔通搭的士咩．

轉機無間道唉

去到日本喎，所有嘢我都梗係會交哂比翻譯員去處理架啦，其一，係因為呢啲應該係翻譯員嘅工作，如果唔係埋到Counter，佢同我講日文嗰時我都唔知點答．二來，喂，日本個個男人都係咁將啲工作交哂比啲女人做架啦，幾威啊．當翻譯員排隊買飛嘅時候，我就梗係把握時間企埋一邊睇吓”風景”啦，點知突然聽到翻譯大聲咁叫，我仲以為要喺日本用我唯一識嗰句日文（Bagayalo）添．一睇之下原來翻譯員前面嗰兩個日本婆唔記得左佢地個靚靚Gucci大皮夾，翻譯員只係大聲提佢地拎番啲行李姐．

買完飛覺得有小小餓，但係時間唔係太多，唯有買小小零食頂吓肚喇．食吓食吓突然發現時間已經到左4：10分，因為我地坐正喺買Shuttle個Counter前面，見到好多人去買Shuttle飛，心唸會唔會好多人搭而上唔到呢班車呢，如果趕唔到呢一班車就好可能趕唔切搭6：10個班飛機．於是乎就馬上同翻譯走去Shuttle個站度，最多上車先繼續食零食囉．喺行梗去車站嘅時候同翻譯員吹水問佢：

對話

冒險家：（嘩！我真係好鍾意呢個名）”喟！你咁鍾意Gucci，點解唔靜靜雞攞走埋個靚靚Gucci大皮夾啊？”
翻譯員：“係喎，點解我唸唔到呢？話唔埋仲有好多化妝品送添．唉！”

唔好鬧我住…．

呢個故事未完架…

喺翻譯員都未講哂句嘢之際，我地就見番個靚靚Gucci皮夾同嗰對日本婆…　原來佢地都係搭同一班車去羽田空港．好彩冇貪小便宜姐，如果唔係就可能要試下日本個監獄嘅滋味…呢個故事其實係教訓你地，做人唔可以貪小便宜，路不拾為係唔啱架．

講番轉頭，好彩我地嘅明智決定，當我地去到個Shuttle站嗰時，已經見到好多人喺度排隊，不過拍喺度架Shuttle就唔係去羽田空港嘅．咁我地咪唸住等陣先去排囉．不過我就覺得有啲奇怪，點解佢地一啲都唔似會上呢架車嘅？原先唸住叫翻譯員去問清楚，不過佢好似唔係好記得日文點講咁，可能係未Warm　Up嘅關係，所以佢唔敢去問．於是乎我就做左一個喺今次個Trip嚟講，最正確嘅決定，就係唔理三七二十一，走左埋去排隊喇．哈，你都咪話唔驚啊，原來我地係最後兩個位…

好準時咁上左架Shuttle等開車，點知架Shuttle比前面嗰架頂住，足足遲左成十分鍾先開得出，我地個心就更加急．架Shuttle終於喺五點半先到羽田.

恐怖襲擊?

一落車就梗係睇下班機有冇Delay啦，心唸，如果班機Delay左就馬上去擦餐飽嘅．點知根據Display嘅指示，班機係On　Time仲要我地馬上去Check　In添．我地梗係唔敢唔馬上照指示做啦，嗰啲地勤好Cute，當我地Check　in嗰時翻譯員同佢地講英文，佢地就係咁笑係咁笑，仲要係好開心嗰隻喎，真係令到我有啲變左做明星嘅感覺．

Check　In完啲行李之後覺得仲係好肚餓，所以話零食呢樣野真係唔可以用嚟醫肚架．時間無多，我同翻譯馬上開Walkie，然後分頭尋覓心頭好，當然都係零食啦，鬼叫冇時間咩．以翻譯同我嘅身手，唔洗十五分鍾，我地已經將所有目標都盡收其下．六點都未到我地已經入到閘口．

因為自從九一一之後，機場啲Security Check比平時嚴謹左好多，所以離遠已經見到排隊等Security Check．排左五分鐘左右就到我地，比起我地年頭返香港嗰時已經快左好多，所以仲唸住可能已經放寬左．點不知個Guard係咁指住我個背囊又口噏噏咁都唔知佢講咩．咁我咪開左個背囊比佢自己睇囉，點知佢係咁指住我枝水又指住張抬係咁口噏噏咁，我估佢係叫我張枝水放上抬．放左枝水上抬比佢望完一輪之後佢又做左一個飲水嘅動作，我估佢係叫我飲比佢睇．真係求之不得，鬼死咁口渴，於是咪即刻飲比佢睇，然後佢先肯比我地走咋，起初都覺得洗唔洗咁大陣像啊，點不之返到嚟香港之後睇電視又話有恐怖襲擊，仲話係用Ipod去引爆一支液體炸彈添，先知原來佢地係有先見之明姐，吖！又或是係佢地其實仲早過美國收到風呢？

終於都比我地過左個Security Check．吓？點解個Display個時間係……．六點半嘅？“Call　Lau　Yeah”．早知唔洗趕到連廁記都冇幫襯啦．唉…吓？點解喺幫襯完廁記之後個時間一變再變咁變成六點四十五分架？有冇搞錯？

真係人算不如天算，你唔會估到我上到機都仲要等到差唔多七點先起飛…日本啲行班唔係好準時架咩？Why　Me？我係唔係應該Check吓通勝，睇吓今日係唔係破日？又或是今日不宜遠行呢？喺嗰個時候，我嘅腦海裏面只係唸到一段經典對白，就係”三個字之後又三個字，三個字之後又三個字，一個鐘都嚟緊頭喇老闆，究竟仲要我等到幾時先至起飛啊”．

係飛機上面，坐喺隔離，有一班日本伯伯同婆婆．佢地起左機冇耐，就馬上攞啲包得好靚同埋好香嘅壽司出嚟開餐．因為當時我地都好肚餓，所以就立即攞啲零食出嚟食．起初都覺得好慘，人地就食壽司，我地就食零食…真係好悲涼（即係既悲哀且凄涼）．突然之間翻譯員叫我望吓頭先嗰班伯伯同婆婆，只係見佢地手指指起勢咁指住啲未食完嘅壽司，又口噏噏咁，我地嘅悲涼感覺就立即消失左一半，可能係因為有人陪嘅關係呱，亦都可能係因為戥佢地唔開心呱．

終於到左北海道

去到新千歲機場已經係八點半，個肚仲鬼死咁餓添，冇計啦，全日都只係正正式式食得嗰一餐，仲要係唔好食嘅飛機餐添．事發嘅時間，仲要已經係今朝喺香港飛東京嗰時添，計吓計吓，冇十個鐘都有成九個鐘，所以已經冇任何時間可以再浪費喇，馬上跑左去買巴士飛去京王．又比我地上到八點三十分嗰班巴士，仲以為一切一切嘅黑氣都煙消雲散，誰不知呢個只不過係一個惡夢嘅開始…

根據旅遊書上嘅記載，巴士大概係七十分鍾嘅車程，不過實際時間當然係因應當時嘅交通情況而定啦．比起地鐵，大概慢三十分鐘左右，不過下一班地鐡要成十五分鍾後先開，一加一減，都只係慢十五分鐘，仲要唔洗張啲行李搬上搬落，最好嘅仲係Door　To　Door，因為Shuttle直情去到京王門口，唔洗拖住啲夾行幾條街，點計應該都有So．

已我嘅觀察所得，當時嘅交通應該算得上係暢行無阻．唉，竟然喺啲咁暢通嘅交通情況下，我坐嘅巴士都要十點先可以到達札幌京王酒店．全程大概都用左九十分鍾左右，唉！所以話有時旅遊書講嘅嘢真係信唔過，可惜當我地知道嘅時候，已經係太遲喇．全程我就同翻譯員喺咁搵自己嘅位置，無他嘅，都係好無聊同埋想睇吓幾點有飯開咁姐，而且成個鐘坐喺架車上面冇嘢做，又訓唔著．唉，真係好慘架．

札幌Keio

成日都係食得嗰一餐鬼咁難食嘅飛機餐，真係肚餓到暴．Check　In完唸住第一時間放低哂啲行李就馬上去食番餐飽嘅先，點知一上到房就比張按摩椅吸引住，影完一輪想之後就第一時間要試下張椅有幾舒服．呢一日裏面嘅辛勞，係一輪按摩之後立時消失左一半．

喺我按摩期間，翻譯員就好似小朋友咁，不斷咁睇吓間酒店有啲咩新嘢，每隔一段時間佢就會大叫一次，內容分別有：

“嘩！個LCD電視係Sharp架，明牌即係明牌，係清啲喎．”

“嘩！你後面有一部空氣清新機啊．”

“嘩！浴鹽都有喎，今次冇死喇，一陣間要試吓先．”

“嘩！個廁記有個Remote架…咦！原來係用嚟Control點洗Pat　Pat架，咁都得？”

“嘩！洗唔洗咁環保啊？沖水都要分開大同開細？咁大中有細點計先？”

“嘩！個冷氣有得Set溫度喎，喺日本好似好少有喎．”

初探札幌

因為實在係太肚餓，按摩完之後，我地就真係一枝箭咁跑左去搵嘢食．竟然連之前準備好嘅旅遊書都唔記得帶，就行左出去．冇計啦，唯有碰下運氣．行左三四條街，見到間間舖頭都關左門，原來真係冇咩運行添．唉！唯一一間有開嘅舖頭竟然係中國菜？打死我都唔會係日本食中國菜架啦，仲要個樣睇落唔係平添．

行吓行吓終於行返去JR　Tower對面嗰一間立食嘅街邊麵擋，其實一早都見到呢間麵檔，不過真係未食過呢啲企喺度食嘅鋪頭．但係點鬥都係鬥唔過個肚，我地唯有嘗試我地人生裏面嘅第一次立食．只有三種麵可以揀，翻譯喺未經我嘅同意下就幫我叫左個味噌拉麵．起初我個心仲有啲怪佢，仲咩唔話比我聽有啲咩味可以揀，但係當我食完第一啖同佢傾完一陣之後，我開始明白原來翻譯員都係為左我好先唔比我亂嚟…原來另外兩種拉麵，第一種係鹽味，唔係吖嗎，味噌已經咁鹹，鹽味係人食架咩？第二種係油拉麵，Sorry我對佢嘅興趣真係不大．不過其實個麵除左鹹啲之外，麵質都算OK．後來我地先知原來可以叫老板娘加湯架，因為我見到隔離個日本仔咁做囉．不過翻譯員話唔知點講喎，冇計啦，唯有快快趣趣食完，拿拿淋去買d野飲啦．

原來真係有暴走族架

行吓行吓，比我地見到一間Internet　Café，價錢係300Yen一個鐘，都幾Ok，因為小弟喺臨放假之前有啲Project　Launch左．啲嘢就係咁架喇，放左喺度成年喇，冇聲冇氣咁，莫講話Launch，連Update都冇個啊．你一話去旅行咩，佢又話咩好Urgent啊，要即刻Launch喎，唉！真係唔係好放心，所以咪叫翻譯員同我一齊上吓網．點解叫佢一齊？如果唔叫佢一齊我點識同嗰啲人講啊？再者，翻譯員都可以飲吓嘢，同埋睇吓啲佢最鍾意嘅日本時裝雜誌吖嗎．誰不知嗰個Internet　Café　Staff嘅英文係我喺日本見過最好嗰啲添．結果我地兩個玩左一個鐘都係800Yen落樓，雖然唔係好知佢條數點計，不過都幾底吖．上完網就梗係急急腳返酒店繼續按摩然之後就早啲訓啦．

係門口已經聽到有好多電單車嘅聲，仲好鬼死嘈吓添，初初以為係有幾架電單車想Show Quali姐．點知我地出到嚟睇到好多架電單車啊，仲要一路行都仲有，佢地全部都蒙住哂面，又個個都載住個人喺後面，而後面嗰個人仲係楂住枝棍係咁Fing係咁Fing，最離譜係佢地根本就唔睇燈，係咁衝係咁衝，真係有啲驚，好彩好快就去到酒店．估都估唔到係咁刺激嘅，直情好似睇梗GTO咁．

我的Picasa相薄

行程

香港 9：10　->　東京成田空港　3：45/4：30　->　東京羽田空空港　5：30/7：00　->　札幌新千歲空港　8：30　->　札幌京王酒店　10：00

2006仲夏北海道雲雨霧之大作戰-前傳

北海道五六月仲夏雲雨霧之大作戰-唉！好慘啊…

1. 分工

做任何事只要唔係One　Man　Band，分工都係好緊要嘅事．今次嘅北海道之旅只有兩個成員，分別係

影子冒險家





姓别：男

絕技：冒險




LV級日文翻譯員：“點解加個影子喺前面啊”

影子冒險家：“冇點解啊，型啲吖嗎，唔型咩？”

LV級日文翻譯員：“咁又係幾型喎！呵呵呵．”

影子冒險家：（影子咪即係假架囉．點解假？仲洗問？問吓你自己咪知點解囉，呢度又話咁，嗰度又話咁…　點冒險啊…）

LV級日文翻譯員：“咩話？”

影子冒險家：“冇，我冇講嘢啊”




簡稱：冒險家（真係型）




LV級日文翻譯員




姓别：女

絕技：梗係日文翻譯啦




LV級日文翻譯員：“點解係LV級啊？”

冒險家：“LV喎，梗係名牌啦！仲好高貴添．”

LV級日文翻譯員：“高貴又真係形容得幾貼切喎．”

冒險家：（LV最多嘅就梗係B貨啦，咁都要問，呢個字又話唔識，嗰字又話唔肯定，唔係B貨係咩啊）

LV級日文翻譯員：“你講咩啊？”

影子冒險家：“我都冇講嘢！”




簡稱：翻譯員（幾普通）

2. 定日子

早在二月份，我已經睇中五月三十一日有一日端午節假期，請四日有九日喎，仲唔係事半假倍，何其快感．而且小弟亦於五月二十三日考完哂所有嘅試．（個心其實一早已經飛左去玩…）．喺嗰段時間去旅行簡直係Perfect之中嘅Perfect．

3. 定路線

今次話哂都係畢業旅行喎，梗係揀啲特別得嚟又好恨去嘅地方啦，最好係風景比較靚，可以影多啲靚相留念吖嗎．最初心目中其實係想去拉斯維加斯或者歐洲．拉斯維加斯係我想去左好耐嘅地方，不過就唔係今次嘅最好選擇，因為主要都係賭錢姐，一唔係就係睇Show，翻譯員對呢個地方嘅興趣就真係不大囉，咁又係嘅，都冇咩好特別，今次唔去等第時老啲去都冇問題．而歐洲其實係翻譯員發開口夢都話要去嘅地方，不過我地都唔係好得閒去Plan行程，因為其實我同翻譯員今年都係Final　Year，所以都係唔衰得，如果唔係出師無名不特止，仲要再比錢讀多一年添，嗰陣唔慌冇得再去多一次畢業旅行喇．

咁點呢？唸唸吓，唸起其實喺我認識翻譯員嗰時，佢已經成日話要去北海道架啦，不過好似小朋友咁，次次都比其他地方吸引左去，然後就不了了之．唸吓唸吓，不如就今次去北海道啦，一來北海道啲風景係人都話靚，二來去北海道好似冇去歐洲咁難，Plan起上嚟都易啲吖，於是就係咁，我地一至決定左去北海道．仲可以順個靚便幫翻譯員慶祝埋生日添，仲唔係一舉兩得？

要去玩，地點定左，之後就梗係搵Package先啦．見到ANA嘅Package比其他公司嘅Package平左成千五蚊．不過去北海道同返香港嗰程都要喺東京轉機．係就係比直飛耐左啲，一來一回都冇左一日，仲要自費買Shuttle飛來回成田同羽田添，冇咩So．但係有一樣好，就係可以比個機會翻譯員去東京停一日，去掃下貨咁啦，唔洗等佢咁慘，入到寳山（日本），竟然要空手而回，等佢生日都可以Shop吓ping，生日都生得開心啲吖．（去到先知呢個唸法原來係多餘嘅）個Package仲可以比我地揀京王Sapporo添（好近JR　Tower）．同埋仲可以喺唔同嘅機場走添．如果可以喺唔同嘅機場走，就可以不走回頭路，應該可以慳到好多時間架，話唔定可以連東京轉機嘅時間都可以賺翻返嚟添．

但係最頭痛嘅就係喺邊度走好呢？最慘嘅就仲係唔可以慢慢睇，因為已經聽到其他同事講話Wait唔到七月嘅機票．吓？二月開始Wait七月嘅機票都Wait唔到．係！我知七月係Peak　Season但係問左Agent姐姐，佢都話啲機位真係好緊張，係去就好快啲Book喎．

唯有限定自己只可以用兩日嘅時間，睇書又好，睇論壇又好，當務之急就係要決定好所有要去嘅地方．最後我同翻譯員都同意要去哂道央，東，南，北．嘩！嘩！嘩！會唔會太多地方去會好趕呢？不過我地都覺得今次其實可以當係探路之旅．如果北海道真係咁好玩，而又真係玩唔哂嘅話，可以日後再接再厲．起碼有左今次嘅經驗，下次再度行程都冇咁難．

第二個問題，就係究竟先由道央上道北然後去道東，最Last先去道南好吖？定係由道央落道南再上道北，最Last先去道東好呢？不斷喺論壇睇其他人分享出嚟嘅遊記．亦不斷喺唔同嘅旅遊嘅論壇問問題．亦冇咩頭緒．唸吓唸吓唔知點解覺得道央去道南係近過道央去道東，所以最後就決定左方案二．即係由道央落道南再上道北，最Last先去道東．最東既機場就係網走嘅女满別空港．決定哂就梗係唔洗問阿貴，Book左機位先啦．

唔到你唔信，五月廿七号出發去東京嘅機票已經滿左．我同翻譯員足足Wait左個幾禮拜都冇聲氣．因為我地真係好想去旅行而又好唔想改期，Agent姐姐話比我地聽，話因為好多人都好似我地咁，貪埋個端午節，所以都唔知會唔會Wait到．之但係真係好慘囉，所有機票都冇問題，唯獨去東京嗰張出事，唯今之計就一係早一日，一係就遲一日，一向視旅行為最高樂趣嘅我地，梗係有早冇遲啦，早一日就多一日，遲一日就少兩日喎（條數真係咁計架）．於是就叫Agent姐姐試下幫我地Book早一日去啦．皇天終於都不負有心人，Agent姐姐差唔多馬上就回覆OK．

當我地正歡天喜地咁上網鑽研行程之際，慘劇原來已經喺不知不覺間發生左……呢個決定原來係錯嘅．仲要係錯到離哂大譜嗰隻．因為當我地睇北海道道路情報縱合案內，先知道原來係北海道好大架，道央去道南大概要五個鍾．道南去道北亦然．你冇睇錯，係真係要五個鍾，反而由道央去道北再落道東原來係好順架．唉！心情直插谷底…點解二份一機會都揀錯…真係”命運是對手”…（冇睇過阿信嘅你可能唔知係咩，亦都咩必感受得到我地呢一刻嘅心情，不過我地後來先知咩叫低處未算低~~~）

4. 租車編

唔錯都錯左囉，唔開心都唔係解決問題嘅辦法．唯有收拾心情，繼續努力搵料，希望可以Plan好啲個行程．咁就算係錯都可以有番啲安慰．實行學埋阿信咁唱埋下一句”永不低頭，從來没抱怨半句，不去問理由”．

喺論壇同啲旅遊書睇到，五月同六月嘅北海道，如果係想睇花嘅話，就有鬱金香同芝櫻．但係有鬱金香同芝櫻睇嘅地方就未必有車到．想坐的士都唔係話咁易，有網友仲試過等極都等唔到的士，想Call的士又唔識日文，有人仲試過搵人幫手Call的士，不過唔知係唔係溝通有問題定係點，總知等嚟等去都冇的士到，真係唔上唔落．又睇到好多網友嘅慘痛行錯路經驗，真係睇到自己都覺得攰啊．點解？北海道咁大，行錯路嘅代價係要再行多好多好多嘅路先可以返番入去啱嘅路...你都咪話唔驚．而有啲火車嘅班次係好疏啊，有啲疏到兩個鐘一班，如果Plan錯，你都咪話唔驚．你都知啦，決定High Level行程咁簡單我地都錯到咁，真係唔敢想像我地會Plan左啲咩出嚟．

咁點呢？唸嚟唸去，都只係唸到一個解決嘅方法，就係自己租車．但係正所謂人生路不熟，仲要周圍都係荒山野領冇地標添…好彩科技嘅野，真係日新月異，而家好似有一樣嘢叫GPS．睇過好多其他網友分享嘅經驗，知道其實有GPS嘅幫助，只要你有齊所有想去地方嘅電話號碼，應該都冇咩問題．不過最好都係要對你要去嘅地有大概嘅認識．如果個地方明明係喺東面，但係GPS就話係喺西面嘅時候，咁你就要Check清楚喇，因為有時書上面啲電話係錯嘅．我今次就有試過咁嘅經驗喇，好彩有得用五十音嚟輸入，所以最後我地都去到所有要去嘅地方．千奇唔好唔記得欏番個國際車牌．只係要八十大元，近照兩張，一個小時，都幾方便．就係咁，我就做埋司機嘞．Book車囉喎，就梗係司機嘅責任喇．

Book車原來都幾難架喎，最麻煩嘅就係要搵一間租車公司可以喺札幌取車，女满別還車．而最好嘅就梗係要有Cruise　Control啦，話哂都要楂長途車喎．我地又唔食煙，所以我地要Non-smoking　Car．唔……如果係Hybrid　Car就仲好，慳好多油吖嗎．

心目中就想租Honda　Civic　Hybrid，點知Honda女滿別空港冇得還車…　Shit！Mazda　唔係我杯茶．我個人對Mitsubishi又有啲…抗拒．Nissan　我都幾鍾意，不過一來佢個Site就冇英文，二來，札幌取車，女滿別還車係要用兩個空港中間嘅距離嚟計錢，仲要以per　km計．佢個Site又冇得幫我計埋條數，我就冇咩興趣去計喇，因為我以經好煩架喇，佢又唔係特別平．三來，佢個Site又真係好鬼死難用，簡單啲講就唔係好識，又唔係好想Book佢．而家先知啲UI難用，係真係會令顧客流失，第時Design　UI嗰時，真係要唸清唸楚．

翻譯員：”囉嚟講啦，明明就係唔係好鍾意Nissan啲車！”


冒險家：“~~~~”

其實我仲有搵過其他租車公司架：例如　JRERL，Japaren，e-Budget，Nippon　Rent　a　Car，Orix　Rent　a　Car，Wing　Rent　a　Car，JNET　Rent　a　Car，Yado　Plaza　同　Tocoo．有啲都好平架，不過一係難用，唔係就冇得喺女滿別空港還車（我已經開始有啲後侮喺網走度走，如果係喺函館走就易搵好多，可能因為函館真係比網走方便好多，所以好多租車公司都可以喺函館還車），或是就係冇得揀Model，有啲連Brand都冇得揀添．唉！咁樣搞下搞下就搞左成個幾禮拜．最後都係唔好搞咁多，唯有Book我最唔想，但係又最穏陣嘅　Toyota啦．一來啲車又唔會太差，（聽過其他網友講，試過喺上面提過嗰啲Site度Book車，但係竟然要楂啲600cc嘅車，真係冇咩力水．）二來又可以喺女滿別空港還車．三來對我地啲唔識日文嘅人就簡直係Perfect，因為我地可以同Hertz租，而且Hertz係鬼佬Site，所以可以同佢地用英文溝通．

同Hertz　Book車係要用Email，不過係Book之前我都係想Confirm清楚佢地Charge我幾多錢，亦都想知佢地可唔可以Meet哂我所有嘅Requirement．Hertz啲Staff真係覆得好快，差唔多即日就收到Reply，不過就係壞消息．佢話冇得揀　Model喎，仲要等兩至三日先知Book唔Book到．佢亦都冇覆我有冇Non-Smoking　Car同Cruise　Control．但係就要我先將Credit　Card號碼比佢．來回左幾個Email情況都係冇咩點變．

我唔想喺咁唔清唔楚嘅情況下Confirm佢地個Booking．又真係好唔甘心，所以我決定直接同Toyota　Book．好彩佢地有地方比我問問題，起初都十五十六架，因為唔知佢地明唔明我想問咩，話哂都係用英文吖．點知係第二日就收到佢地嘅回覆，雖然比Hertz慢一啲，但係起碼溝通冇問題先啦．個回覆大致上都同Hertz嘅回覆差唔多，不過既然可以同佢地溝通就梗係直接同佢地問清楚，然後就直接同佢地Book啦．

點知佢地每答一個問題都要一至兩日，有時仲唔止添，雖然我每一次都已經將所有問題寫哂出嚟，不過佢地每一次都只係答我一個問題…我知錯啦…　玩吓玩吓都玩左個幾兩個禮拜，得出嚟嘅結果都係一樣．不過佢地就好肯定咁答我，話要Fix　Non　Smoking　Car　就唔可以揀Model，佢地仲話所有嘅車都冇Cruise　Control喎．咩話？冇可能！喺呢個時候，我真係好希望阿翻譯員可以幫到我忙．不過同佢講嚟講去，佢都話唔知點用日文問呢條問題喎．唉！時間已經唔可以比我再玩落去．為左減低傷忙，唯有Confirm　Non　Smoking　Car　最Cheap個Range啦，起碼到時唔會失望吖嗎，因為根本就冇希望過啲咩．（最後去到日本先知點問…）

5. 租酒店編

租酒店係全個準備過程裏面最順利嘅．可能係因為翻譯員喺呢方面嘅能力真係好高．不過我地都有啲問題唔係好知點算．好似：

第一　喺小樽究竟留唔留一晚？我地不斷聽到關於小樽嘅印象都係一個字”細”，而且札幌同小樽都好近，所以可以喺札幌嗰時去埋．不過翻譯員就真係好想Book小樽水族館附近嗰間溫泉酒店，但係最後我地都放棄左呢個唸法，因為要轉酒店真係好煩．

第二　喺函館究竟留幾多晚呢？最初我覺得函館都唔係好大，所以留一晚咩都玩哂，後來有其他網友喺留言板裏面見議我地留多一晚，佢話函館其實好靚，都有唔小地方可以影相嘅．當我一將呢件事情話比翻譯員聽嗰時，佢就馬上話贊成呢個網友嘅講法，於是乎我地就決定喺函館留兩晚喇．（後來先知呢個原來係一個陰謀嚟嘅，到而家我都仲係覺得留言嘅唔係翻譯員，就一定係佢啲Friend~~）

而酒店方面我地係揀左私人露天風呂排行榜裏面排第一位嘅：湯之川渚亭溫泉酒店．佢個website仲有英文添，都算係最易Book嗰間喇．

跟住要Book富良野落腳嘅地方，我同翻譯員都一至贊成住民宿，一來，有番啲風味吖嗎，二來，嚟富良野就梗係搵啲原始啲嘅酒店架啦．喺好多遊記入面都提到Kumasan呢個名，原本都OK冇問題，不過翻譯員就比較想搵一啲有私人廁記．後來竟然比佢搵到一間有酒店嘅Scale，而仲係保持住民宿價錢嘅Perfect地方．呢間咁Perfect嘅民宿就係Pension　Furanui．仲可以用英文同佢地thru　email做Booking添．

由富良野去網走，我地就揀左喺阿寒湖停一停，因為第一，阿寒湖有一間叫鶴雅嘅酒店，呢間酒店來頭唔小，連阿蔡生都話冇得頂（冇睇過蔡生嗰啲旅遊節目或是書嘅，好快啲去睇吓啦．），呢間酒店仲係溫泉酒店排行榜裏面排No．1添．二來，阿寒湖比較近我地想去嗰啲芝櫻同鬱金香公園，咁樣個行程會比較順．不過要Book呢間酒店就有啲困難，因為佢地個Website要求你要有一個日本電話號碼先接受你嘅Booking．好彩有個叫Rakuten　Travel嘅website　可以幫人Book酒店，不過有一個後遺症，就係佢會不斷咁Send啲Promotional　Material嘅email比你．所以最好用一個唔會點用嘅email嚟做Booking啦．

最後，喺網走我地就Book左網走湖莊，呢個Website好易Book，仲有英文添．Book佢嘅原因都係因為佢喺正個網走湖隔離，風景唔錯咁姐．

6. 有用資料編

Forum:

北海道互助社群

呢個係一個好Active嘅社群，我有好多問題都係喺呢度搵到答案架

北海道自遊易討論區

都唔少資料，不過我放嘅貼就無人答…可能問得太過白痴，好慘

遊記:

Pancy　and　Skingo　的旅行相簿

呢個並唔係一個普通嘅旅行相簿，唔睇你走寶．你有呢份遊記睇都係多得佢…冇睇過呢一份咁精彩嘅遊記就冇今日你睇梗嘅呢份遊記．點都好，我地都係想同人地分享一吓我地嘅經驗姐

道央之旅　By　TravelPooh

記住睇佢個留言冊啊，你估唔到咁多嘢睇架

圍威喂

想知多啲龍上町個鬱金香公園有幾靚就一定要入去睇吓喇

駕駛：

旅遊人生

租車必睇，好多高手架

北海道駕駛大作戰

佢都好多北海道駕駛經驗可以同你分享架

北海道Navi

可以話比你聽地方之間嘅距離

日本交通條例

標誌

都係標誌

仲有其他有用嘅Website:

好多北海道食嘢舖頭嘅資料

DawnDawnDog

唔知點解個名改得咁怪，不過佢都有好多北海道嘅有用資料

北海道Event List

可以話比你聽邊個時間喺邊個地方有啲咩Event

北海的魅力

JR北海道

一張好Cute嘅北海道地圖

北海道天氣

有氣溫，日照，風向，降雨量同積雪嘅資料添

北海道天氣

有七天天氣預測

北海道天氣資料

北海道花期

有哂成個北海道所有地方全年嘅花期

札幌:

札幌觀光協會

JR Tower

Steller Place

拉麵共和國

雪印Parlor本店

味之計時台

電視塔

三月拉麵

狸小路

小樽:

小樽市

壽司屋通

Wing Bay Otaru

Wall Otaru

富良野:

富良野市

富良野事務局

彩香之里

富田農場

美英:

美英町觀光協會

四季彩之丘

登別:

登別市

登別熊牧場

旭川:

旭山動物園

其他：

藻琴山芝櫻公園

龍上町芝櫻公園

上湧別町鬱金香公園

沖繩資料

一路都有唔少朋友問我去沖繩嘅資料，好可惜我當年無寫到遊記。好彩仲有少少記憶，為左可以幫到搵梗料嘅你，我就將我so far有嘅資料放落Blog度，希望可以幫到搵梗料去沖繩嘅你啦。

去沖繩之前一定要有一個心理心準備，就係所有嘢都真係幾貴，可能因為真係幾多日本人去，而日本嘅生活指數不嬲都唔低，就算食同玩都好幾貴。搭車就仲貴。車錢放面，如果你兩個人由那霸去萬坐毛（多數玩嘅都仲遠過萬坐毛架）都成一千yen一個人，當然係講梗搭巴士啦，無記錯搭的士就4-5000yen左右，點解我會知？因為好早就無巴士搭（好多都係五點尾班車），所以我上次咪好貴咁搭左唔少的士囉。所以租車一定底過搭巴士，仲可以自由好多。但係去之前check吓你要去嘅地方幾點close，因為好多都幾早close架，去到無得玩就唔好啦。仲有，有d巴士d班次係好梳架，成個鐘先一班，所以我都係去四日，但係就玩唔哂本島囉。

楂車都幾易架，因為差唔多係得一條路，事關沖繩係一個長條型嘅國家，而且仲有GPS添，但係要做定功課，攞定哂你要去嘅地方嘅電話號碼先得。好多地方都有電話號碼架，就算係好偏嘅都會有架，上網或者買本書睇啦。BTW，好似有day tour帶你去本島架，你問吓travelpooh啦，佢好好人架，下面有佢個site嘅URL。

如果一心係想去玩snorkling嘅話，我見議如果有時間就出島玩，因為d魚真係多好多又靚好多架。 仲有，本島嘅海灘係好大浪架，我地就唔係好可以游到水，連snorking都玩得好辛苦。

景點方面有：－
國際通 （可以夜晚先去，不過無美國村開得咁夜，但係我覺得唔去無損失，因為只係shop手信only）
牧志第一市場 （我就去食龍蝦shashimi同龍蝦面豉湯，都唔錯架）
美濱美國村 （可以嘅話夜晚先去，因為都開得幾夜吓，唔好浪費日頭時間，有間叫A&W嘅漢保包好好食架，又大件，又唔貴）
万座毛 （我覺得唔係好特別，不過個個都話要去）
RENAISSANCE （以前好似可以同海豚玩）
海洋博 （極力推介，不過都幾遠吓）
鳳梨公園 （去完海洋愽可以順便去一吓就OK。我就無去過，因為覺得無嘢玩）
仲有一間酒店有個海底觀望basement，不過要比錢架，亦唔係一定要去，因為唔係太清楚
島方面我就無介紹，因為我都無去到，事關阿翻譯員唔搭得長途船，不過我有個friend去過哂，佢就話d島係一定要去，因為真係好好靚，仲靚過本島好多

下面有d有用嘅Link：－

論壇
沖繩
http://www.travellife.org/viewforum.php?f=58
http://bbs.diy-jp.info/viewforum.php?f=5
http://www.jpstay.com/phpBB2/viewforum.php?f=11
http://www.ec2japan.com/phpBB2/viewforum.php?f=22

日本
http://www.hkcities.com/forum/viewforum.php?f=7
http://www.backpackers.com.tw/forum/viewforum.php?f=51

遊記(都有用架)
http://hk.myblog.yahoo.com/iam-lor/article?mid=686&prev=754&next=685 (好似有講東瀛遊個tour喎)
http://www.travellife.org/viewtopic.php?t=14468 (好詳細吓架,你仲可以上去travelpooh.com睇吓其他料,有問題可以上去佢留返個message,佢好好人一定答架)
http://www.ec2japan.com/phpBB2/viewtopic.php?t=26238 (好多遊記嘅link)
http://www.travellife.org/viewtopic.php?t=18246 (料唔多)

租車
Honda
Mazda
Mitsubishi
Nissan
Toyota (好似而家有英文site，不過我唔記得個URL

下面d公司實平d，但係可能會比架600cc你，不過如果你唔mind都可以，但係要睇清楚可唔可以唔同地方還車，因為唔係間間都得，就算得都要比charge。日本租車係日日計錢，如果早左或者遲左還都唔緊要，因為佢計返你錢，不過係用hourly rate計，可能會貴d，睇吓你遲幾耐還。還車之前記得入返油比佢地，唔係嘅話佢會charge返你油錢，當然會比油站貴d。

JRERL
Japarene-Budget
Nippon　Rent　a　Car
Orix　Rent　a　Car
Wing　Rent　a　Car
JNET　Rent　a　Car
Yado　Plaza
Tocoo 好似好平，如果你唔min係咩車，可以睇哂咁多間公司先，因為不定期會有promotion.。

希望幫到手啦。

2006仲夏北海道雲雨霧之大作戰-行程編

小弟於2006年五月尾到北海道，此行實在令到小弟大開眼界，亦令到我下定決心，要在不同的時候再去北海道冒險冒險．

全文其實已經大至完成，記載於"2006仲夏北海道雲雨霧之大作戰"。可是小弟用上了只有香港人會說的廣東話，來做我這編遊記的語言，實在令到一眾不會廣東話的朋友為難不已．令到原本是為了幫助計畫去北海道的朋友而寫的遊記變得全無意義．

本來我已經下定決心，要把這編遊記從新用白話文寫一次，但是這個任務對小弟來說實在是有一點吃力．最後小弟都還是放棄了這一個偉大的任務了．Anyway，如果對北海道有興趣的話亦可到小弟的遊記看看能否得到一點幫助．

立此連結的原因是：不知是否因為小弟的遊記用了Dojo的fisheye library的關係，或是小第的遊記實在沒人看得明白，Google就是沒有把我的遊記放入Database中．但是我當然已經申請左，不管怎樣，我還想盡一點努力，希望令到小弟的遊記可以在Google中search得到，所以就寫下這一編文章作為小弟遊記得一個連結吧．

閒話實在說得太了多吧．．．．．．

日子：二零零六年五月二十六日至六月四日


第一日：二零零六年五月二十六日星期五
天氣：已不太清楚了，原因全日都是在交通工具上，只是記得沒有下雨吧．
行程：香港　9：10　->　東京成田空港　3：45/4：30　->　東京羽田空空港　5：30/7：00　->　札幌新千歲空港　8：30　->　札幌京王酒店　10：00
相簿：我的第一日Picasa相薄
遊記：出發啦

第二日：二零零六年五月二十七日星期六
天氣：天晴
行程：札幌京王酒店　10：10　->　小樽浪漫館　10：40/11：50　->　正壽司　12：22/12：59　->　小樽水族館　13：22/14：04　->　小樽雪印　14：33/16：20　->　小樽運河　16：28/16：50　->　札幌Kani將軍　18：00/19：20　->　丸丼今丼　19：40/22：40　->　札幌京王酒店　23：00
相簿：我的第二日Picasa相薄
遊記：攞車　–　執左笠咁大鑊？真係風回路轉

第三日：二零零六年五月二十八日星期日
天氣：雨多晴少
行程：札幌京王酒店　10：10　->　白之戀人館　10：39/11：50　->　蛯天　12：40/13：30　->　啤酒博物館+Sapporo　Factory　13：50/18：08　->　藥房　18：10/18：24　->　炭炭　18：58/19：34　->　丸丼今丼　19：40/20：20　->　T38　20：40/21：20　->　札幌京王酒店　21：44
相簿：我的第三日Picasa相薄
遊記：白之戀人館有驚喜

第四日：二零零六年五月二十九日星期一
天氣：早晴晚陰
行程：札幌京王酒店　9：40　->　札幌畤計台　9：57/10：00　->　大通公園　10：13/10：27　->　丸丼今丼　10：40/11：00　->　雪印Parlor本店　11：16/11：40　->　札幌畤計台　11：52　->　二条市場　12：35/13：30　->　玫瑰園　13：50　->　湯之川渚渟溫泉酒店　19：00
相簿：我的第四日Picasa相薄
遊記：再見札幌

第五日：二零零六年五月三十日星期二
天氣：陰，大霧
行程：湯之川渚渟溫泉酒店8：35　->　五稜郭公園　8：46/10：00　->　八幡”土反”/遺愛幼稚園/東正教教堂　10：13/10：30　->　金森紅磚倉庫　10：32/12：00　->　函館朝市　12：20/13：06　->　金森紅磚倉庫　13：10/15：00　->　丸丼今丼　15：15/16：10　->　函館山　16：45/17：35　->　湯之川渚渟溫泉酒店　17：59
相簿：我的第五日Picasa相薄
遊記：五稜郭公園有靚女

第六日：二零零六年五月三十一日星期三
天氣：細雨連綿
行程：湯之川渚渟溫泉酒店　5：40　->　函館朝市　06：20/06：37　->　富良野朝日之Ataru家　12：37/13：20　->　富田農場　13：35/14：52　->　彩香之里　14：57　->　Ningru　Terrace　15：35/15：57　->　Pension　Furanui　16：10
相簿：我的第六日Picasa相薄
遊記：原來油站都有分係唔係二十四小時架…　好眼訓啊…　ZZ．．Z．．zz．．z．．

第七日：二零零六年六月一日星期四
天氣：凍，陰
行程：Pension　Furanui　8：24　->　美馬牛小學　9：05　->　四季彩之丘　9：08/09：31　->　龍上町芝櫻公園　11：46/13：10　->　上湧別町鬱金香公園　14：10/15：05　->　阿寒湖鶴雅酒店　18：00
相簿：我的第七日Picasa相薄
遊記：原來美瑛嘅四季彩之丘仲靚架

第八日：二零零六年六月二日星期五
天氣：凍，雨，陰，大風
行程：阿寒湖鶴雅酒店　->　阿寒湖商店街　08：10/9：14->　藻琴山溫泉芝櫻公園　10：40/11：25　->　網走流冰館　12：10/12：50　->　網走站　13：40/13：14：00　->　立北民族博物館　14：45/15：16　->　網走湖莊　15：35
相簿：我的第八日Picasa相薄
遊記：原來…我已經Miss左最受歡迎嗰個溫泉喇

第九日：二零零六年六月三日星期六
天氣：晴
行程：網走湖莊　10：22　->　網走站　11：20/12：00　->　女滿別空港　12：33　->　羽田空港　16：45　->　Metropolitan　Hotel　18：00　->　池代Sunshine　City　18：20　->　天丼　19：40/20：10　->　Metropolitan　Hotel　20：40
相簿：我的第九日Picasa相薄
遊記：太陽出來了

第十日：二零零六年六月四日星期日
天氣：晴
行程：Metropolitan　Hotel　->　Tobu　->　天下一品　->　Metropolitan　Hotel　->　成田空港　->　赤立角機場
相簿：我的第十日Picasa相薄
遊記：又要返香港喇

星戰都有前傳啦，我梗係唔會輸比佢啦。我已經將事前所有準備嘅細節都記錄左入我嘅前傳入面。

除左個前傳之外，我仲多佢一個後記添，後記入面其實記錄左我做呢個website嘅過程，亦有少少今次旅行嘅心得同洗費比大家參考吓。